Mohammed Siraj: జస్ప్రీత్ బుమ్రా లేని లోటును తీర్చిన మహ్మద్ సిరాజ్..6 వికెట్లతో అదుర్స్

Mohammed Siraj: జస్ప్రీత్ బుమ్రా లేని లోటును భారత స్టార్ పేస్ బౌలర్ మహ్మద్ సిరాజ్ తీర్చేశాడు. ఎడ్జ్‌బాస్టన్‌లో భారత్-ఇంగ్లాండ్ మధ్య జరుగుతున్న రెండో టెస్ట్ మ్యాచ్ మూడో రోజు, సిరాజ్ అద్భుతంగా బౌలింగ్ చేసి ఇంగ్లాండ్‌ను 407 పరుగులకు ఆలౌట్ చేశాడు. హ్యారీ బ్రూక్, జేమీ స్మిత్ ల సెంచరీలు, రికార్డు భాగస్వామ్యం టీమిండియాకు కష్టాలు తెచ్చినా, సిరాజ్ రెండో కొత్త బంతితో ఇంగ్లాండ్ కథను ముగించాడు. అంతేకాదు, 548 రోజుల తర్వాత టెస్ట్ క్రికెట్‌లో ఒకే ఇన్నింగ్స్‌లో 5 వికెట్లు తీసి సిరాజ్ అదరగొట్టాడు. ఈ మ్యాచ్‌లో అతను మొత్తం 6 వికెట్లు పడగొట్టాడు.

ఎడ్జ్‌బాస్టన్ టెస్ట్ మొదటి ఇన్నింగ్స్‌లో టీమిండియా 587 పరుగులు చేసింది. దీనికి బదులుగా, రెండో రోజు ఆట ముగిసే సమయానికి ఇంగ్లాండ్ 3 వికెట్లు కోల్పోయింది. వాటిలో 2 వికెట్లు ఆకాష్ దీప్ తీయగా, ఒకటి సిరాజ్‌కు దక్కింది. ఆ తర్వాత, జూలై 4 నాడు సిరాజ్ మూడో రోజును అద్భుతంగా ప్రారంభించాడు. రెండో ఓవర్‌లోనే రెండు కీలక వికెట్లు తీశాడు. అతను వరుస బంతుల్లో జో రూట్, కెప్టెన్ బెన్ స్టోక్స్‎ను పెవిలియన్‌కు పంపాడు.

అయితే, ఆ తర్వాత జేమీ స్మిత్, హ్యారీ బ్రూక్ మధ్య 303 పరుగుల రికార్డు భాగస్వామ్యం కుదిరింది. మూడో సెషన్‌లో కొత్త బంతి రాగానే, ఆకాష్ దీప్ ఈ భాగస్వామ్యాన్ని విడదీశాడు. ఆ తర్వాత సిరాజ్ తన ప్రతాపాన్ని చూపించి, ఇంగ్లాండ్ చివరి వరుస బ్యాటర్లను అస్సలు నిలబడకుండా చేశాడు. సిరాజ్ ఏమాత్రం ఆలస్యం చేయకుండా చివరి 3 వికెట్లను కూడా తీసి, ఇంగ్లాండ్‌ను 407 పరుగులకే కట్టడి చేశాడు. ఈ ప్రదర్శనతో సిరాజ్ టెస్ట్ క్రికెట్‌లో నాలుగోసారి ఒకే ఇన్నింగ్స్‌లో 5 వికెట్లు తీసిన ఘనతను సాధించాడు. ఈ ఇన్నింగ్స్‌లో సిరాజ్ 70 పరుగులు ఇచ్చి 6 వికెట్లు పడగొట్టాడు.

సిరాజ్‌కు ఇది చాలా ప్రత్యేకమైన క్షణం, ఎందుకంటే 548 రోజుల సుదీర్ఘ నిరీక్షణ తర్వాత టెస్ట్ క్రికెట్‌లో ఒకే ఇన్నింగ్స్‌లో 5 లేదా అంతకంటే ఎక్కువ వికెట్లు తీశాడు. కాకతాళీయంగా, చివరిసారి కూడా అతను 6 వికెట్లే తీశాడు. భారత పేసర్ 2024 జనవరి 3న కేప్‌టౌన్‌లో దక్షిణాఫ్రికా పై 6 వికెట్లు తీసి, దక్షిణాఫ్రికాను కేవలం 55 పరుగులకే ఆలౌట్ చేశాడు. ఆశ్చర్యకరంగా, సిరాజ్ తన 4 ఐదు వికెట్ల ప్రదర్శనలలో 3 సార్లు జస్ప్రీత్ బుమ్రా జట్టులో లేనప్పుడే చేశాడు. సిరాజ్‌తో పాటు, ఆకాష్ దీప్ కూడా కొత్త బంతితో అద్భుతంగా బౌలింగ్ చేసి మిగిలిన 4 వికెట్లు తన ఖాతాలో వేసుకున్నాడు.