Manchester Test: మాంచెస్టర్ టెస్ట్‌లో బుమ్రా ఎంట్రీ పై సిరాజ్ కీలక ప్రకటన

Manchester Test: భారత్, ఇంగ్లండ్ మధ్య జరుగుతున్న ఐదు టెస్ట్ మ్యాచ్‌ల సిరీస్‌లో నాలుగో మ్యాచ్ జూలై 23 నుండి మాంచెస్టర్‌లోని ఓల్డ్ ట్రాఫోర్డ్ స్టేడియంలో ప్రారంభం కానుంది. ఈ కీలక మ్యాచ్‌కు ముందు, భారత జట్టు ఫాస్ట్ బౌలర్ మహ్మద్ సిరాజ్ ప్రెస్ కాన్ఫరెన్స్ నిర్వహించి, టీమిండియా ప్లేయింగ్-11పై పెద్ద అప్‌డేట్ ఇచ్చాడు. భారత జట్టు ప్రస్తుతం ఆటగాళ్ల గాయాలతో సతమతమవుతోంద. కాబట్టి ప్లేయింగ్-11లో మార్పులు ఖాయం. ఈ పరిస్థితుల మధ్య మహ్మద్ సిరాజ్ ఒక స్టార్ ప్లేయర్ ఆడే విషయాన్ని ధృవీకరించాడు.

మాంచెస్టర్ టెస్ట్‌కు ముందు జరిగిన ప్రెస్ కాన్ఫరెన్స్‌లో మహ్మద్ సిరాజ్ ఒక ముఖ్యమైన అప్‌డేట్ ఇచ్చి అభిమానులకు ఊరట కలిగించాడు. స్టార్ బౌలర్ జస్‌ప్రీత్ బుమ్రా ఈ డూ ఆర్ డై మ్యాచ్‌లో భారత జట్టుతో ఉంటాడని సిరాజ్ స్పష్టంగా చెప్పాడు. భారత జట్టు ఈ సిరీస్‌లో 1-2తో వెనుకబడి ఉంది. మాంచెస్టర్ టెస్ట్‌లో గెలిచి సిరీస్‌ను సమం చేయాలనుకుంటోంది. ఇలాంటి కీలక సమయంలో జస్‌ప్రీత్ బుమ్రా ఉండటం భారత బౌలింగ్‌ను మరింత బలోపేతం చేస్తుంది.

సిరాజ్ ప్రెస్ కాన్ఫరెన్స్‌లో మాట్లాడుతూ.. "జస్సీ భాయ్ కచ్చితంగా ఆడతాడు. ఆకాష్ దీప్‌కు గ్రోయిన్ సమస్య ఉంది. అతను ఈరోజు బౌలింగ్ చేశాడు.. ఫిజియో చూస్తారు. టీమ్ కాంబినేషన్ మారుతోంది." అని అన్నాడు. ఈ సిరీస్‌లో బుమ్రా ఇప్పటివరకు రెండు టెస్ట్ మ్యాచ్‌లలో అద్భుతమైన ప్రదర్శన చేశాడు. ఇందులో రెండు సార్లు ఐదు వికెట్ల హాల్‌తో సహా మొత్తం 12 వికెట్లు పడగొట్టాడు.

మాంచెస్టర్‌లోని ఓల్డ్ ట్రాఫోర్డ్ మైదానంలో భారత్ టెస్ట్ రికార్డు అంతగా మంచిగా లేదు. భారత్ ఈ మైదానంలో ఇప్పటివరకు 9 టెస్ట్ మ్యాచ్‌లు ఆడింది. కానీ ఒక్క విజయం కూడా సాధించలేదు. ఇలాంటి పరిస్థితుల్లో శుభ్‌మన్ గిల్ నేతృత్వంలోని భారత జట్టు ముందు చరిత్రను మార్చాల్సిన సవాలు ఉంది. మరోవైపు, ఈ మ్యాచ్‌లో భారత్ ఓడిపోతే, ఇంగ్లండ్‌కు సిరీస్‌లో తిరుగులేని ఆధిక్యం లభిస్తుంది. కాబట్టి, టీమిండియా ఈ మ్యాచ్‌ను ఏది ఏమైనా గెలవాలని కోరుకుంటోంది. బుమ్రా రాక జట్టుకు పెద్ద బలంగా మారనుంది.