Jersey No. 18: కోహ్లీ లేకున్నా.. ఇంగ్లాండ్‌లో జెర్సీ నంబర్ 18 మ్యాజిక్.. వైభవ్ తర్వాత అదరగొట్టిన స్మృతి

Jersey No. 18 : క్రికెట్‌లో విరాట్ కోహ్లీ (Virat Kohli) అంటే 'జెర్సీ నంబర్ 18' గుర్తుకొస్తుంది. అతను టెస్ట్ క్రికెట్ నుంచి రిటైర్ అయ్యాడు కాబట్టి, ఇప్పుడు ఇంగ్లాండ్‌లో జరుగుతున్న మ్యాచ్‌లలో ఈ నంబర్ మ్యాజిక్ ఎలా ఉంటుందని చాలా మంది అనుకున్నారు. కానీ, కేవలం రెండు రోజుల్లోనే ఇద్దరు యువ భారత క్రికెటర్లు – వైభవ్ సూర్యవంశీ, స్మృతి మంధాన ఈ ప్రశ్నకు అదిరిపోయే సమాధానం ఇచ్చారు. ఈ ఇద్దరూ తమ అద్భుతమైన ఆటతో ఇంగ్లాండ్‌లో 'జెర్సీ నంబర్ 18' హవాను కొనసాగించారు.

జూన్ 27న జరిగిన అండర్-19 వన్డే మ్యాచ్‌లో 18వ నంబర్ జెర్సీ వేసుకున్న వైభవ్ సూర్యవంశీ కేవలం 19 బంతుల్లోనే 48 పరుగులు (5 సిక్సర్లు, 3 ఫోర్లతో) చేసి సత్తా చాటాడు. అతని మెరుపు ఇన్నింగ్స్‌తో భారత్ 6 వికెట్ల తేడాతో గెలిచింది. సరిగ్గా మరుసటి రోజు, జూన్ 28న, మహిళల T20 ఇంటర్నేషనల్ మ్యాచ్‌లో, 18వ నంబర్ జెర్సీ వేసుకున్న స్మృతి మంధాన కేవలం 62 బంతుల్లో 112 పరుగులు (15 ఫోర్లు, 3 సిక్సర్లతో) చేసి అద్భుతమైన శతకం బాదింది. ఇది ఆమెకు T20 లో తొలి సెంచరీ కావడం విశేషం. స్మృతి మంధాన అదరగొట్టడంతో భారత మహిళల జట్టు 97 పరుగుల తేడాతో గెలిచి సిరీస్‌లో ఆధిక్యం సాధించింది.

ఇలా విరాట్ కోహ్లీ లేకపోయినా, వేరే జట్లలో 'జెర్సీ నంబర్ 18' పవర్ ఇంకా కొనసాగుతుందని వైభవ్ సూర్యవంశీ, స్మృతి మంధాన తమ ఆటతో నిరూపించారు. ఈ యువ ఆటగాళ్ల ప్రదర్శనలు చూస్తుంటే, భారత క్రికెట్ భవిష్యత్తు చాలా బాగుందనిపిస్తోంది.