IPL 2025: ఐపీఎల్ 2025 ముగింపు వేడుక.. శంకర్ మహదేవన్ ప్రత్యేక ప్రదర్శన!

IPL 2025: ఐపీఎల్ 2025 (IPL 2025) ఫైనల్ మ్యాచ్ జూన్ 3న అహ్మదాబాద్‌లోని నరేంద్ర మోదీ స్టేడియంలో రాయల్ ఛాలెంజర్స్ బెంగళూరు (RCB), పంజాబ్ కింగ్స్ (PBKS) మధ్య జరగనుంది. ఈ సీజన్‌లో రెండు టీమ్‌లు అద్భుతంగా ఆడి ఫైనల్‌లో చోటు దక్కించుకున్నాయి. ఇప్పుడు ఫైనల్‌లో కూడా రెండు టీమ్‌ల ఆటగాళ్లు అద్భుత ప్రదర్శన చేస్తారని అందరూ ఆశిస్తున్నారు. ముందుగా కోల్‌కతాలోని ఈడెన్ గార్డెన్స్‌లో ఫైనల్ మ్యాచ్‌ను నిర్వహించాలని అనుకున్నారు. అయితే, భారత్-పాకిస్తాన్ మధ్య ఉద్రిక్తతల కారణంగా టోర్నమెంట్‌ను 10 రోజుల పాటు నిలిపివేశారు. ఇప్పుడు ఈ ఫైనల్ మ్యాచ్ అహ్మదాబాద్‌లోని నరేంద్ర మోడీ స్టేడియంలో జరుగుతుంది. ఈ ఫైనల్‌కు ముందు, అహ్మదాబాద్‌లో ఒక ముగింపు వేడుక (Closing Ceremony) కూడా జరగనుంది. ఇందులో చాలా మంది ప్రముఖులు ప్రదర్శన ఇవ్వనున్నారు.

శంకర్ మహదేవన్ ప్రత్యేక ప్రదర్శన!

ఈసారి ముగింపు వేడుక చాలా ప్రత్యేకంగా ఉండనుంది. ప్రముఖ గాయకుడు శంకర్ మహదేవన్ భారత సాయుధ దళాలకు అద్భుతమైన రీతిలో నివాళులర్పించనున్నారు. ఆయన ప్రదర్శన ఆపరేషన్ సింధూర్‌లో పాల్గొన్న వీర సైనికులను గౌరవిస్తుంది. పహల్‌గామ్ దాడిలో ప్రాణాలు కోల్పోయిన వారిని స్మరించుకుంటుంది. ముగింపు వేడుక భారత కాలమానం ప్రకారం సాయంత్రం 6:00 గంటలకు ప్రారంభమవుతుంది. దీని ప్రత్యక్ష ప్రసారం స్టార్ స్పోర్ట్స్ నెట్‌వర్క్, జియోహాట్‌స్టార్ యాప్, వెబ్‌సైట్‌లో ఉంటుంది.

పంజాబ్ vs RCB మధ్య హోరాహోరీ పోటీ!

ఫైనల్ మ్యాచ్‌లో ఆర్‌సిబి, పంజాబ్ మధ్య గట్టి పోటీ ఉంటుందని అంచనా. ఈ రెండు టీమ్‌ల మధ్య ఇప్పటివరకు 36 ఐపీఎల్ మ్యాచ్‌లు జరిగాయి. ఇందులో పంజాబ్ కింగ్స్ 18 మ్యాచ్‌లు గెలిస్తే, రాయల్ ఛాలెంజర్స్ బెంగళూరు కూడా 18 మ్యాచ్‌లు గెలిచింది. క్వాలిఫైయర్-1లో రాయల్ ఛాలెంజర్స్ బెంగళూరు టీమ్ పంజాబ్ కింగ్స్‌పై విజయం సాధించింది. ఇక పంజాబ్ కింగ్స్ విషయానికి వస్తే, శ్రేయాస్ అయ్యర్ నాయకత్వంలోని టీమ్, క్వాలిఫైయర్-2లో ముంబై ఇండియన్స్‌ను ఓడించి ఫైనల్‌కు దూసుకొచ్చింది. ఈ సీజన్‌లో రెండు టీమ్‌ల మధ్య మూడు మ్యాచ్‌లు జరిగాయి. ఆర్‌సిబి రెండు మ్యాచ్‌లు గెలిస్తే, పంజాబ్ ఒక మ్యాచ్ గెలిచింది. ఈ ఫైనల్ మ్యాచ్ చాలా ఉత్సాహంగా సాగనుంది.