Dhoni: మరో ఆర్నెళ్లు కష్టపడాలి.. అప్పుడే తెలుస్తుంది.. ధోని రిటైర్మెంట్‌పై మళ్లీ ప్రశ్న!

Dhoni: ఐపీఎల్ 2025 సీజన్‌లో చెన్నై సూపర్ కింగ్స్ ప్రయాణం ముగిసింది. ఐదుసార్లు జట్టును ఛాంపియన్‌గా నిలిపిన ఎంఎస్ ధోని కెప్టెన్‌గా తిరిగి వచ్చినా జట్టును కాపాడలేకపోయాడు. ప్లేఆఫ్ రేసు నుంచి ముందే నిష్క్రమించిన చెన్నై, ఒక ఉత్కంఠభరిత పోరులో డిఫెండింగ్ ఛాంపియన్ కోల్‌కతా నైట్ రైడర్స్‌ను 2 వికెట్ల తేడాతో ఓడించింది. ఈ విజయంలో ధోని చిన్నదే కానీ కీలక పాత్ర పోషించాడు. అయితే జట్టు విజయం తర్వాత మరోసారి అతని రిటైర్మెంట్ ప్రశ్న తెరపైకి వచ్చింది. ధోని ఇచ్చిన సమాధానం అభిమానుల గుండెల్లో మళ్లీ దడ పుట్టించింది.

ఈడెన్ గార్డెన్స్ స్టేడియంలో బుధవారం, మే 7న చెన్నై సూపర్ కింగ్స్ కోల్‌కతా నైట్ రైడర్స్‌తో తలపడింది. ఈ మ్యాచ్‌లో 180 పరుగుల లక్ష్యాన్ని ఛేదిస్తూ చెన్నై 19.4 ఓవర్లలో 2 వికెట్ల తేడాతో విజయం సాధించింది. గత కొన్ని మ్యాచ్‌ల్లో లక్ష్యాన్ని ఛేదించడంలో విఫలమైన చెన్నై తీవ్ర విమర్శలు ఎదుర్కొంది. ధోని కూడా వైఫల్యాల కారణంగా విమర్శలు పాలయ్యాడు. అయితే ఈసారి ధోని చివరి వరకు నిలబడి జట్టును గెలిపించడంలో ముఖ్యమైన పాత్ర పోషించాడు. చివరి ఓవర్‌లో సిక్సర్ కొట్టి మ్యాచ్‌ను చెన్నై వైపు తిప్పాడు.

రిటైర్మెంట్‌పై ధోని ఏమన్నాడంటే?

ఈ సీజన్‌లో చెన్నైకి ఇది మూడో విజయం మాత్రమే. సీజన్ మధ్యలో అతను కెప్టెన్‌గా మారినప్పటికీ, జట్టు టోర్నమెంట్ నుంచి నిష్క్రమించిన మొదటి జట్టుగా నిలిచింది. దీని కారణంగా ధోని రిటైర్మెంట్ ప్రశ్న నిరంతరం తలెత్తుతూనే ఉంది. అయితే జట్టు విజయం తర్వాత పోస్ట్ మ్యాచ్ ప్రజెంటేషన్‌లో ఈ ప్రశ్న మళ్లీ అడగగా, ధోని సమాధానం ఇవ్వడానికి ఇది సులభమైన నిర్ణయం కాదని చెప్పాడు. దాని వెనుక తన బలహీనతను కూడా వెల్లడించాడు. ధోని మాట్లాడుతూ, "ఈ ఐపీఎల్ ముగిసిన తర్వాత, నా శరీరం ఇంత ఒత్తిడిని తట్టుకోగలదా అని తెలుసుకోవడానికి నేను వచ్చే 6-8 నెలలు చాలా కష్టపడాలి. నేను ఇంకా ఏమీ నిర్ణయించుకోలేదు" అని అన్నాడు.

సీజన్ ప్రారంభంలో రిటైర్మెంట్ ఊహాగానాలు

అయితే ఈ సీజన్ మధ్యలో ధోని రిటైర్మెంట్ ఊహాగానాలు చాలా ఎక్కువగా వినిపించాయి. చెన్నైలో ఢిల్లీ క్యాపిటల్స్‌తో జరిగిన మ్యాచ్ కోసం ధోని తల్లిదండ్రులు చెపాక్ స్టేడియానికి వచ్చినప్పుడు ఈ ఊహాగానాలు ఊపందుకున్నాయి. ధోని కెరీర్‌లో అతని తల్లిదండ్రులు మ్యాచ్ చూడటానికి స్టేడియానికి రావడం ఇదే మొదటిసారి. అప్పుడు అది ధోని చివరి మ్యాచ్ అని చాలా మంది అనుకున్నారు. అయితే అది జరగలేదు. కెప్టెన్ రుతురాజ్ గైక్వాడ్ గాయం కారణంగా సీజన్ మొత్తానికి దూరమవడంతో ధోని మళ్లీ జట్టు పగ్గాలు చేపట్టాడు.