Chris Woakes: టెస్ట్ సిరీస్‌లో మరో స్టార్ ప్లేయర్ ఔట్.. క్రిస్ వోక్స్‌కు తీవ్ర గాయం!

Chris Woakes: భారత్, ఇంగ్లండ్ మధ్య జరుగుతున్న టెస్ట్ సిరీస్‌లో ఆటగాళ్లకు గాయాలవడం కొనసాగుతూనే ఉంది. సిరీస్ మొదటి మ్యాచ్ నుండి నాలుగవ మ్యాచ్ వరకు రెండు జట్ల ఆటగాళ్లు ఎవరో ఒకరు గాయాలతో ఇబ్బందులు పడుతూనే ఉన్నారు. ఓవల్‌లో జరుగుతున్న చివరి టెస్ట్ మ్యాచ్‌లో కూడా ఈ పరంపర కొనసాగింది. మ్యాచ్ మొదటి రోజునే ఒక కీలక ఆటగాడు గాయపడ్డాడు. గత రెండు టెస్టుల్లో భారత స్టార్ ఆటగాడు రిషబ్ పంత్ గాయపడగా, ఈసారి ఇంగ్లండ్ సీనియర్ పేస్ బౌలర్ క్రిస్ వోక్స్ గాయపడి మైదానం వీడారు.

ఓవల్ స్టేడియంలో ప్రారంభమైన సిరీస్ చివరి టెస్ట్ మ్యాచ్ మొదటి రోజు, ఇంగ్లండ్ మొదట బౌలింగ్ చేసింది. ఈ సిరీస్‌లో ప్రభావం చూపలేకపోయిన 36 ఏళ్ల వోక్స్, బౌలర్లకు అనుకూలమైన పిచ్‌పై ఇంగ్లండ్‌కు మంచి ఆరంభాన్ని ఇచ్చారు. భారత జట్టును కష్టాల్లోకి నెట్టారు. మొదటి సెషన్‌లోనే ఈ సిరీస్‌లో 500కు పైగా పరుగులు చేసిన కేఎల్ రాహుల్‌ను కేవలం 14 పరుగులకే పెవిలియన్‌కు పంపించి భారత జట్టుకు భారీ షాక్ ఇచ్చారు.

ఆ తర్వాత కూడా వోక్స్ కొన్ని మంచి ఓవర్లు వేశారు. కానీ మొదటి రోజు ఆట ముగిసే ముందు ఒక దురదృష్టకర సంఘటన జరిగింది. భారత ఇన్నింగ్స్ 57వ ఓవర్‌లో జేమీ ఓవర్టన్ బౌలింగ్ చేస్తున్నారు. అతని ఓవర్ ఐదవ బంతిని కరుణ్ నాయర్ ఆన్ డ్రైవ్ ఆడారు. బంతిని ఆపడానికి క్రిస్ వోక్స్ బౌండరీ వైపు వేగంగా పరుగెత్తి, బంతిని బౌండరీ దాటకుండా ఆపారు. దీనివల్ల భారత్‌కు కేవలం 3 పరుగులు మాత్రమే వచ్చాయి. కానీ, ఒక పరుగు కాపాడే ప్రయత్నంలో ఇంగ్లండ్‌కు మరింత పెద్ద నష్టం జరిగింది. వోక్స్ బంతిని ఆపడానికి డైవ్ చేసినప్పుడు, అతను తనను తాను కంట్రోల్ చేసుకోలేకపోయారు. బౌండరీకి బయట ఉన్న యాడ్ బోర్డుకు బలంగా ఢీకొన్నారు. ఆయన ఎడమ భుజం ఆ బోర్డుకు బలంగా తగలడంతో ఆయన తీవ్రమైన నొప్పితో అక్కడే పడిపోయారు.

వోక్స్ అక్కడే పడుకుని నొప్పితో విలవిలలాడారు. వెంటనే ఇంగ్లండ్ క్రికెట్ మెడికల్ టీమ్ మైదానంలోకి వచ్చి ఆయనను పరీక్షించింది. వోక్స్ మైదానంలో ఉండలేరని స్పష్టమైంది. ఆయన మెడికల్ టీమ్ సహాయంతో మైదానం బయటకు వెళ్లిపోయారు. ఆ తర్వాత తిరిగి రాలేదు. ఇంగ్లండ్ క్రికెట్ బోర్డు ఆయన గాయం గురించి ఎలాంటి అధికారిక సమాచారం ఇవ్వలేదు. కానీ వోక్స్ పరిస్థితి చూస్తే, ఈ మ్యాచ్‌లో ఆయన మళ్లీ బౌలింగ్ చేయడం కష్టమని స్పష్టంగా తెలుస్తోంది. ఇది ఇంగ్లండ్ జట్టుకు పెద్ద ఎదురుదెబ్బ.