తదుపరి ఉప రాష్ట్రపతిగా ఎవరు..? నీతీశ్ కుమార్, శశిథరూర్, లెఫ్టినెంట్ గవర్నర్లు రేసులో!

Vice President Race 2025: ఎవరు నెక్స్ట్ ఉప రాష్ట్రపతి..?

పార్లమెంట్ వర్షాకాల సమావేశాల సందర్భంగా ఉప రాష్ట్రపతి జగదీప్ ధన్‌ఖడ్ ఆకస్మికంగా రాజీనామా చేయడం రాజకీయం లో సంచలనంగా మారింది. దీంతో, తదుపరి ఉప రాష్ట్రపతి ఎవరు? అన్న ఉత్కంఠ పెరిగింది. ప్రస్తుతం ఈ పదవికి పలువురు ప్రముఖుల పేర్లు తెరపైకి వస్తున్నాయి. అందులో బిహార్ ముఖ్యమంత్రి నీతీశ్ కుమార్, శశిథరూర్, లెఫ్టినెంట్ గవర్నర్లు వీకే సక్సేనా, మనోజ్ సిన్హా లాంటి ప్రముఖులు ముందంజలో ఉన్నారు.

బిహార్ రాజకీయాల నుంచి ఉప రాష్ట్రపతి కుర్చీకి నీతీశ్..?

బిహార్‌లో సమీపంలో అసెంబ్లీ ఎన్నికలు జరగనున్న నేపథ్యంలో, ఎన్డీయే (NDA) లోని భాగస్వామ్య పార్టీ జేడీయూకి నాయకత్వ మార్పు అవసరమని అంచనాలు కొనసాగుతున్నాయి. నీతీశ్ కుమార్ను రాష్ట్ర రాజకీయాల నుండి ప్రెజిడెన్షియల్ పోస్ట్‌కి పంపి, బిహార్ సీఎం పదవిని బీజేపీకి ఇవ్వాలన్న వ్యూహంపై చర్చలు జరుగుతున్నాయి. దీనివల్ల జేడీయూకు డిప్యూటీ సీఎం పదవి ఇవ్వనున్నట్లు సమాచారం. నీతీశ్ కుమార్ కుమారుడు నిషాంత్ కుమార్ పేరు కూడా డిప్యూటీ సీఎం పదవికి చర్చలో ఉంది.

శశిథరూర్‌ను భాజపాలోకి తెచ్చే మార్గమేనా..?

శశిథరూర్ గత కొన్ని రోజులుగా కేంద్ర ప్రభుత్వ అనుకూల వ్యాఖ్యలతో కాంగ్రెస్‌కు దూరంగా ఉన్నట్లు ప్రచారం జరుగుతోంది. ఇటీవల ఆపరేషన్ సిందూర్పై కేంద్రం నియమించిన కమిటీలో ఆయన నేతృత్వం వహించడం ఇదే ప్రచారానికి బలాన్ని చేకూర్చింది. ఈ నేపథ్యంలో శశిథరూర్‌కు ఉప రాష్ట్రపతి పదవి దక్కే అవకాశాలు ఉన్నట్లు ఊహాగానాలు వస్తున్నాయి. త్వరలో ఆయన భాజపాలో చేరవచ్చనే ప్రచారం బలంగా వినిపిస్తోంది.

లెఫ్టినెంట్ గవర్నర్లకు సర్ప్రైజ్ ఛాన్స్..?

ఉప రాష్ట్రపతి పదవికి మరో రెండు పేర్లు కూడా రేసులో ఉన్నాయి:

1. వీకే సక్సేనా (VK Saxena) – దిల్లీ లెఫ్టినెంట్ గవర్నర్‌గా గత మూడు సంవత్సరాలుగా రాజకీయాలను ప్రభావితం చేశారు. AAP ప్రభుత్వంతో తగాదాలు, కీలక నిర్ణయాలు తీసుకోవడం వల్ల కేంద్రం దృష్టిని ఆకర్షించారు.
2. మనోజ్ సిన్హా (Manoj Sinha) – జమ్మూ కశ్మీర్ లెఫ్టినెంట్ గవర్నర్‌గా సేవలందిస్తున్న సిన్హా పదవీకాలం ఈ ఆగస్టు 6తో ముగియనుంది. ఆయన మోదీ మొదటి మంత్రివర్గంలో సహాయమంత్రి కూడా. ఆర్టికల్ 370 రద్దు తర్వాత రాష్ట్రపాలనలో కీలక పాత్ర పోషించారు.

ఉప రాష్ట్రపతి ఎన్నిక త్వరలో.. ఎన్డీయే ఆధిపత్యం స్పష్టమే!

ఉప రాష్ట్రపతి ఎన్నికలు త్వరలో నిర్వహించే అవకాశాలు కనిపిస్తున్నాయి. ఎన్డీయేకి పార్లమెంట్‌లో మెజారిటీ ఉన్నందున, ఈ పోటీలో ఎవరిని నిలబెట్టినా విజయం ఖాయం అనే అంచనాలు రాజకీయం వర్గాల్లో వినిపిస్తున్నాయి.