శ్రీనగర్‌లో ఉగ్రదాడి.. ఇద్దరు జవాన్ల మృతి

శ్రీనగర్‌లోని పాండక్ ప్రాంతంలో బుధవారం బీఎస్‌ఎఫ్ పెట్రోలింగ్‌పై ఉగ్రవాదులు దాడి చేశారు. ఈ దాడిలో ఇద్దరు పారామిలిటరీ ఫోర్స్‌కు చెందిన జవాన్లు మృతి చెందారు. జవాన్లు మరణించినట్లుగా బీఎస్ఎఫ్ అధికారులు దృవీకరించారు. వారు సరిహద్దు భద్రతా దళానికి చెందిన 37 బెటాలియన్ పార్టీకి చెందినవారుగా తెలుస్తోంది. అంతేకాదు వారివద్ద ఉన్న రెండు ఆయుధాలను కూడా ఉగ్రవాదులు తీసుకెళ్లారు. బైక్ ద్వారా వచ్చిన కొంతమంది ఉగ్రవాదులు బిఎస్ఎఫ్ పార్టీపై దాడి చేసినట్లు నివేదికలు తెలిపాయి.

దాడి తరువాత ఈ ప్రాంతాన్ని చుట్టుముట్టారు , ఉగ్రవాదులను పట్టుకోవటానికి భారీ వేట ప్రారంభించారు. కాగా అంతకుముందు, శనివారం సాయంత్రం, జమ్మూ కాశ్మీర్ కుల్గాం జిల్లాలోని యారిపోరా సమీపంలో భద్రతా దళాలు , పోలీసు చెక్‌పోస్టులపై ఉగ్రవాదులు దాడి చేశారు, ఇందులో జమ్మూ కాశ్మీర్ పోలీసు హెడ్ కానిస్టేబుల్ మహ్మద్ అమీన్ అమరవీరుడయ్యారు. ఆయన పుల్వామా నివాసి అయినట్టు తెలుస్తోంది.

ఇదిలావుంటే ఇటీవల హిజ్బుల్ ముజాహిదీన్ టాప్ కమాండర్ రియాజ్ నైకును భద్రతా దళాలు హతమార్చాయి. రెండేళ్లపాటు అతన్ని మోస్ట్ వాంటెడ్ జాబితాలో చేర్చారు. అనారోగ్యంతో ఉన్న తన తల్లిని కలవడానికి పుల్వామాలోని బెగ్పోరా గ్రామానికి వచ్చాడు. ఈ గ్రామంలో నైకు ఉన్నాడని అతని సహచరులు కొంతమంది నుండి పోలీసులకు సమాచారం అందింది. దాంతో అతన్ని ఎన్ కౌంటర్ చేశాయి.