PM Modi: ట్రంప్‌కు చెక్..! గాల్వాన్ తర్వాత తొలిసారి చైనా పర్యటనకు ప్రధాని మోదీ

ప్రధాని నరేంద్ర మోదీ చైనా పర్యటనకు రంగం సిద్ధమైంది. ఈ నెల 31వ తేదీ నుంచి రెండు రోజుల పాటు ఆయన చైనాలో పర్యటించనున్నారు. ఈ సందర్భంగా షాంఘై సహకార సంస్థ (SCO) సదస్సులో మోదీ పాల్గొననున్నారు. చైనా ప్రభుత్వం పంపిన ఆహ్వానాన్ని స్వీకరించిన ప్రధాని, గాల్వాన్ లోయ ఘటన తర్వాత తొలిసారి ఆ దేశంలో అడుగుపెట్టనున్నారు. దీంతో ఈ పర్యటనకు మళ్లీ ప్రాధాన్యత లభించింది.

ఈ సందర్భంగా మోదీ - జిన్‌పింగ్‌ల మధ్య కీలక చర్చలు జరగనున్నాయి. ముఖ్యంగా అమెరికా అధ్యక్షుడు ట్రంప్ ఇటీవల చైనా, భారత్‌పై టారిఫ్‌లు పెంచిన తరుణంలో, ఆర్థిక సంబంధాల దృక్కోణంలో ఈ పర్యటనకు ప్రాధాన్యత మరింత పెరిగింది. భారత్ - చైనా మధ్య గత కొంతకాలంగా నెమ్మదిగా మెరుగవుతున్న సంబంధాలకు ఇది ఒక బలమైన ముందడుగు కావొచ్చు.

జపాన్, రష్యా పర్యటనలు ముందుగానే

చైనా టూర్‌కు ముందు, ఆగస్టు 30న ప్రధాని మోదీ జపాన్ పర్యటనకు వెళ్లనున్నారు. అక్కడ జపాన్ ప్రధాని ఫ్యూమియో కిషిదాతో కలిసి భారత్-జపాన్ వార్షిక శిఖరాగ్ర సమావేశంలో పాల్గొననున్నారు. జపాన్ నుంచి నేరుగా చైనాకు వెళతారు.

అంతేకాక, ఈ పర్యటనల ముందే జాతీయ భద్రతా సలహాదారు అజిత్ దోవల్ రష్యాలో పర్యటించి, మాస్కోలో రష్యన్ అధికారులతో కీలక భేటీ నిర్వహించనున్నారు. ఈ భేటీలో రక్షణ, చమురు ఆంక్షలు, భద్రతా సహకారంపై చర్చలు జరగనున్నాయి. రాబోయే మోదీ-పుతిన్ భేటీకి ఇది ఒక ముందు ఆత్మీయతగా భావించవచ్చు.

గాల్వాన్ తర్వాత పరిణామాలు

గతంలో, 2019లో జరిగిన SCO సదస్సులో పాల్గొనడానికి మోదీ చివరిసారి చైనాకు వెళ్లారు. ఆ తర్వాత గాల్వాన్ లోయలో జరిగిన ఘర్షణల నేపథ్యంలో రెండు దేశాల మధ్య సంబంధాలు తీవ్రంగా ప్రభావితమయ్యాయి. అయితే ఇటీవల కాలంలో చైనా తరఫున సానుకూల సంకేతాలు కనిపించగా, భారత్ కూడా వ్యూహాత్మకంగా స్పందిస్తోంది.

ఈ నేపథ్యంలో ప్రధాని మోదీ ఈ టూర్ ద్వారా చైనా అధ్యక్షుడు జిన్‌పింగ్‌తో ముఖాముఖి చర్చలు జరపనుండడం, రెండు దేశాల మధ్య సంబంధాల పునరుద్ధరణకు దోహదపడే అవకాశముంది. అమెరికా హెచ్చరికల నడుమ భారత్ తీసుకుంటున్న ఈ డిప్లొమాటిక్ స్టెప్స్ ప్రపంచ రాజకీయాల్లో కొత్త దారితెరుస్తున్నాయి.