Top
logo

చైనా దూకుడుకు చెక్..అమెరికాతో భారత్ రక్షణ ఒప్పందం!

చైనా దూకుడుకు చెక్..అమెరికాతో భారత్ రక్షణ ఒప్పందం!
X
Highlights

అమెరికాతో రక్షణ సంబంధాల్లో మరో ముందడుగు వేసింది భారత్. దీంతో రెండు దేశాల మధ్య మరింత బలోపేతమైన రక్షణ సంబంధం...

అమెరికాతో రక్షణ సంబంధాల్లో మరో ముందడుగు వేసింది భారత్. దీంతో రెండు దేశాల మధ్య మరింత బలోపేతమైన రక్షణ సంబంధం ఏర్పడింది. ఎప్పటి నుంచో పెండింగ్ లో ఉన్న బెకా (బేసిక్ ఎక్స్చేంజ్ అండ్ కో ఆపరేషన్ ఎగ్రిమెంట్) పై ఈరోజు రెండు దేశాల నాయకులు సంతకాలు చేశారు. ఇందుకోసం భారత రక్షణ మంత్రి రాజ్‌నాథ్‌ సింగ్‌, విదేశీ వ్యవహారాల శాఖ మంత్రి జైశంకర్‌, అమెరికా రక్షణ శాఖ మంత్రి మార్క్‌ ఎస్పర్‌, అమెరికా విదేశాంగశాఖ మంత్రి మైక్‌ పాంపియో హైదరాబాద్‌ హౌస్‌లో సమావేశమయ్యారు.

గత 2 దశాబ్దాలుగా భారత్‌, అమెరికా మధ్య ద్వైపాక్షిక సంబంధాలు మరింత బలోపేతమవుతున్నాయని విదేశాంగశాఖ మంత్రి జైశంకర్‌ అన్నారు. ప్రపంచీకరణ నేపథ్యంలో అంతర్జాతీయ సవాళ్లను ఎదుర్కొవడం చాలా ముఖ్యమని, దీనికి భారత్‌, అమెరికా మధ్య సంబంధాలు ఎంతో దోహదం చేస్తాయని చెప్పారు.

సమాచార మార్పిడికి 'బెకా' ఒప్పందం సరికొత్త మార్గాలను తెరిచిందని ఈ సందర్భంగా రక్షణమంత్రి రాజ్‌నాథ్‌ సింగ్‌ పేర్కొన్నారు. ఈ ఒప్పందాన్నిపూర్తి చేసినందుకు చాలా ఆనందంగా ఉందని వ్యాఖ్యానించారు. ఇతర సమస్యలపైనా అమెరికాతో చర్చించేందుకు భారత్‌ సిద్ధంగా ఉందని ఆయన అన్నారు. రెండు ప్రజాస్వామ్య దేశాలు కలిసి అభివృద్ధి చెందే అవకాశం ఈ ఒప్పందం ద్వారా లభించిందని అమెరికా విదేశాంగ శాఖ మంత్రి పాంపియో తెలిపారు. ప్రపంచంలో కరోనా వ్యాప్తి నివారణ చర్యలు, ప్రపంచ రక్షణ అంశాలపై చైనా ప్రభావం తదితర అంశాలపై ఇంకా చర్చించాల్సి ఉందన్నారు. గతంతో పోల్చుకుంటే గత ఏడాది కాలంలో రక్షణ, భద్రత రంగాల్లో ఇరు దేశాలూ మరింత బలపడ్డాయని అమెరికా రక్షణ శాఖ మంత్రి మార్క్‌ ఎస్పర్‌ అన్నారు. ఇండో పసిఫిక్‌ రీజియన్‌లోని భద్రతాపరమైన సమస్యల పరిష్కారానికి ఈ ఒప్పందం మరింత దోహదపడుతుందని పేర్కొన్నారు.

ఈ ఒప్పందం ఏమిటంటే..

'బెకా' ఒప్పందం వలన భారత్, అమెరికా దేశాలు అత్యాధునిక సైనిక సాంకేతికత, వసతి కేంద్రాలతోపాటు అంతరిక్ష సంబంధిత పటాలను పరస్పరం వినియోగించుకునేందుకు వీలు కలుగుతుంది. ఈ ఒప్పందంలో భాగంగా అమెరికా ఉపగ్రహాలు, సెన్సర్లు సేకరించే సమాచారాన్ని, భౌగోళిక, అంతరిక్ష సమాచారాన్ని భారత్‌తో పంచుకునే అవకాశముంటుంది. ఈ ఒప్పందం విషయామై తొలి చర్చలు 2018 సెప్టెంబరులో ఢిల్లీలో జరిగాయి. తరువాత రెండోసారి గత ఏడాది డిసెంబరులో వాషింగ్టన్‌లో జరిగాయి. తూర్పు సరిహద్దుల్లో డ్రాగన్‌ దేశం పదేపదే రెచ్చగొడుతున్న వేళ తాజా ఒప్పందం ప్రాధాన్యం సంతరించుకుంది. మరోవైపు ప్రాంతీయ, అంతర్జాతీయ శక్తిగా భారత్‌ ఎదుగుతుండటాన్ని తాము స్వాగతిస్తున్నామని అమెరికా తెలిపింది. ఈ నేపథ్యంలో పొరుగు దేశం చైనా దుందుడుకుతనానికి చెక్‌పెట్టేందుకు అమెరికా, భారత్‌ కలిసి పని చేసే అవకాశం ఉన్నట్లు తెలుస్తోంది. దీని ప్రకారం రక్షణ, భద్రతా రంగాల్లో ద్వైపాక్షిక సహకారాన్ని మరింత మెరుగుపర్చుకోవడం, వ్యూహాత్మక సంబంధాలను బలోపేతం చేసుకోవడంపై చర్చల్లో భారత్‌, అమెరికా దృష్టి సారించినట్లు అర్థమవుతోంది.

Web TitleIndia and America signed on basic exchange and co-operation agreement today 27th October given another level of by lateral relation between America and India
Next Story