Coolie : రజనీ స్టామినా అంటే అది మరి.. భారీ ధరకు అమ్ముడుపోయిన కూలీ ఓటీటీ రైట్స్

Coolie : సూపర్‌స్టార్ రజినీకాంత్ అంటేనే బాక్సాఫీస్ వద్ద కలెక్షన్ల వర్షం. 74 ఏళ్ల వయసులో కూడా ఆయనకు ఉన్న క్రేజ్ ఏమాత్రం తగ్గలేదు. ఆయన సినిమాలు మొదటి రోజు నుంచే కోట్ల రూపాయలు వసూలు చేస్తాయి. ఇప్పుడు ఆయన నటించిన కొత్త సినిమా కూలీ విడుదలకు సిద్ధమవుతోంది. ఈ సినిమాను యువ దర్శకుడు లోకేష్ కనగరాజ్ దర్శకత్వం వహిస్తుండటంతో అంచనాలు మరింత పెరిగాయి. సినిమా విడుదల కాకముందే, దాని ఓటీటీ హక్కులు భారీ మొత్తానికి అమ్ముడయ్యాయి.

రజినీకాంత్ కూలి సినిమా ఓటీటీ హక్కులను అమెజాన్ ప్రైమ్ కొనుగోలు చేసింది. ఈ సినిమాను స్ట్రీమ్ చేసేందుకు అమెజాన్ ప్రైమ్ ఏకంగా రూ.120 కోట్లు చెల్లించినట్లు సమాచారం. అయితే, అమెజాన్ ఈ సినిమాను డైరెక్ట్‌గా స్ట్రీమ్ చేస్తుందా లేక అద్దె ప్రాతిపదికన అందుబాటులో ఉంచుతుందా అనేది ఇంకా తెలియాల్సి ఉంది. ఈ సినిమాలో రజినీకాంత్‌తో పాటు అక్కినేని నాగార్జున, ఉపేంద్ర, బాలీవుడ్ స్టార్ ఆమిర్ ఖాన్ కూడా నటిస్తుండటంతో సినిమాపై అంచనాలు భారీగా పెరిగాయి.

కూలీ సినిమా ఒక సాధారణ వ్యక్తికి, అండర్ వరల్డ్ మాఫికాకు మధ్య జరిగే పోరాటం నేపథ్యంలో రూపొందింది. సినిమాలో అక్కినేని నాగార్జున విలన్ పాత్రలో నటిస్తున్నట్లు వార్తలు వస్తున్నాయి. అలాగే, ఉపేంద్ర కూడా నెగటివ్ షేడ్స్ ఉన్న పాత్రలో కనిపించనున్నారని చెబుతున్నారు. తొలిసారిగా బాలీవుడ్ స్టార్ ఆమిర్ ఖాన్ ఈ సినిమాలో అతిథి పాత్రలో నటించారు. ఈ సినిమా గురించి ఆమిర్ ఖాన్ కూడా చాలా ఆసక్తిగా ఉన్నారని సమాచారం. హీరోయిన్‌గా శృతి హాసన్ నటిస్తున్నారని టాక్ నడుస్తోంది, అయితే అది ఇంకా అధికారికంగా తెలియదు. హీరోయిన్‌గా పూజా హెగ్డే కూడా ఇందులో మోనికా అనే పాటలో డ్యాన్స్ చేశారు, ఈ పాట ఇప్పటికే యూట్యూబ్‌లో ట్రెండింగ్‌లో ఉంది.

కూలీ సినిమా దర్శకుడు లోకేష్ కనగరాజ్ ఈమధ్య ఒక ఇంటర్వ్యూలో సినిమా గురించి కొన్ని విషయాలు పంచుకున్నారు. సినిమా షూటింగ్ పూర్తయిన తర్వాత రజినీకాంత్‌కు చూపించగా, సినిమా చూసి ఆయన చాలా మెచ్చుకుని, లోకేష్‌ను కౌగిలించుకున్నారని తెలిపారు. గతంలో లోకేష్ దర్శకత్వంలో వచ్చిన కమల్ హాసన్ సినిమా విక్రమ్ భారీ విజయం సాధించింది. ఇప్పుడు రజినీకాంత్‌తో కూలీ సినిమా తీయడంతో సినిమాపై అంచనాలు మరింత పెరిగాయి. సినిమాకు ట్రైలర్ విడుదల చేయకూడదని నిర్మాతలు నిర్ణయించుకున్నట్లు సమాచారం. ఈ సినిమా ఆగస్టు 15న థియేటర్లలో విడుదల కానుంది. తమిళం, తెలుగు, హిందీ భాషల్లో ఈ సినిమాను ప్రపంచవ్యాప్తంగా విడుదల చేయనున్నారు.