థియేటర్లుకు జనం వస్తారు.. ఆ సినిమా రిలీజ్ కు అనుమతివ్వకండి సీఎంకు లేఖ

తమిళ టాప్ హీరో విజయ్‌ ప్రధాన పాత్రలో నటించిన సినిమా 'మాస్టర్‌'. 'ఖైదీ'మూవీ ఫేమ్‌ లోకేశ్‌ కనకరాజు ఈ సినిమాకు దర్శకత్వం వహించారు. ఈ చిత్రంలో విజయ్‌ సేతుపతి కీలకపాత్ర పోషించారు. ఈ చిత్రానికి అనిరుధ్‌ స్వరాలు అందించారు. ఈ చిత్రంలోని 'వాతి కమ్మింగ్‌' అనేపాట ప్రేక్షకులను ఎంతగానో ఆకట్టుకున్న విషయం తెలిసిందే.అయితే లాక్‌డౌన్‌ కారణంగా 'మాస్టర్‌' సినిమా విడుదలలో నిలిచిపోయింది. అయితే ఇటీవల తమిళనాడు ప్రభుత్వం సినిమాల షూటింగులకు షరతులతో కూడిన అనుమతి ఇచ్చింది.

ఈ మేరకు 'మాస్టర్‌' సినిమా పోస్ట్‌ ప్రొడక్షన్‌ పనులను పూర్తి చేసుకుంటోంది. మరోవైపు భౌతికదూరం, ఇతర నిబంధనలను పాటిస్తూ జులై నుంచి థియేటర్లు పునఃప్రారంభించుకోవడానికి ప్రభుత్వం అనుమతివ్వనున్నట్టు టాక్ నడుస్తోంది.

ఈ నేపథ్యంలో థియేటర్లు తెరుచుకోగానే మొదటి చిత్రంగా 'మాస్టర్‌' విడుదల చేయాలని థియేటర్‌ యజమానులు భావిస్తున్నారు. 'మాస్టర్‌' షోలతో థియేటర్లు ప్రేక్షకులతో సందడి నెలకొంటుందని భావిస్తున్నారు. కాగా.. సీనియర్‌ దర్శకుడు, నిర్మాతల మండలి మాజీ అధ్యక్షుడు కేయార్‌ ఆ రాష్ట్రంలో సీఎంకు లేఖ రాశారు. థియేటర్లు ఓపెన్ కాగానే 'మాస్టర్‌' చిత్రాన్ని ప్రదర్శించడానికి అనుమతివ్వవద్దని కోరారు. విజయ్ సినిమాకు ప్రేక్షకులు థియేటర్లకు వస్తారని, కరోనా మరింత వ్యాప్తి చెందే అవకాశముంటుందని, అదే జరిగితే విజయ్‌కి ఉన్న మంచిపేరు పోతుందని కేయర్ పేర్కొన్నారు.