OTT Platforms: ఓటీటీ ప్లాట్‌ఫారమ్‌లల్లో అశ్లీల కంటెంట్‌ నియంత్రణపై కేంద్రం కఠిన చర్యలు

ఓటీటీ ప్లాట్‌ఫారమ్‌లపై అభ్యంతరకరమైన, అసాంస్కృతిక కంటెంట్‌ నియంత్రణకు కేంద్ర ప్రభుత్వం గట్టి చర్యలు చేపట్టింది. అశ్లీలత, హింస, అనైతికతను ప్రోత్సహించే వీడియోలను ప్రసారం చేస్తున్న 43 ఓటీటీ వేదికలను నిషేధించినట్లు కేంద్ర సమాచార మరియు ప్రసారాల శాఖ సహాయమంత్రి డా. ఎల్. మురుగన్‌ లోక్‌సభలో వెల్లడించారు.

ఇప్పటికే 43 ఓటీటీ ప్లాట్‌ఫారమ్‌ల బ్లాక్‌

ఇటీవలి కాలంలో 24 యాప్‌లు, వెబ్‌సైట్లను నిషేధించిన కేంద్రం — ఇప్పటివరకు మొత్తం 43 ఓటీటీ ప్లాట్‌ఫారమ్‌లను బ్లాక్‌ చేసింది. ఇది చట్టపరమైన ప్రమాణాలు, నైతికత దృష్ట్యా చేపట్టిన చర్యగా మంత్రి పేర్కొన్నారు.

ఓటీటీలకు కేంద్ర సూచనలు

వయస్సు ఆధారంగా కంటెంట్‌ను వర్గీకరించాలి

పిల్లలకు అనుచితమైన కంటెంట్‌కు యాక్సెస్ నియంత్రణ చర్యలు తీసుకోవాలి

చట్ట విరుద్ధంగా ఉన్న వీడియోలను ప్రసారం చేయరాదు

కంటెంట్‌పై ఓటీటీ సర్వీసులు బాధ్యతాయుతంగా వ్యవహరించాలి

మంత్రిత్వ శాఖల మధ్య పరస్పర సంప్రదింపుల అనంతరం ఈ నిషేధం అమలు చేసినట్లు వెల్లడించారు. ఇప్పటికే కేంద్ర ప్రభుత్వం ఓటీటీ యాప్‌లు, సర్వీస్ ప్రొవైడర్లను హెచ్చరిస్తూ.. వారు ప్రసారం చేసే కంటెంట్‌పై సమగ్ర బాధ్యత వహించాల్సిందిగా సూచించిన విషయం తెలిసిందే.