Vijay Deverakonda: త్వరలో కింగ్‌డమ్ రిలీజ్.. అభిమానులకు ఎమోషనల్ మెసేజ్ పంపిన విజయ్

Vijay Deverakonda: రౌడీ బాయ్ విజయ్ దేవరకొండ నటించిన కింగ్‌డమ్ సినిమాపై తెలుగులో భారీ అంచనాలున్నాయి. ఈ సినిమా జూలై 31న గురువారం నాడు విడుదల కానుంది. జెర్సీ వంటి బ్లాక్‌బస్టర్ సినిమా తీసిన గౌతమ్ తిన్ననూరి ఈ సినిమాకు దర్శకత్వం వహించారు. ఇందులో భాగ్యశ్రీ బోర్సే హీరోయిన్‌గా నటిస్తుండగా, సత్యదేవ్ మరో కీలక పాత్రలో కనిపించనున్నారు. ఇటీవల ఈ సినిమా ప్రీ-రిలీజ్ ఈవెంట్ చాలా గ్రాండ్‌గా జరిగింది. ఈ వేడుకలో విజయ్ దేవరకొండ తన అభిమానులనుద్దేశించి ఎమోషనల్ మెసేజ్ అందించారు. ఈసారి సినిమా విజయం ఖాయమని అభిమానులకు హామీ ఇచ్చారు.

తన అభిమానుల గురించి విజయ్ దేవరకొండ గర్వంగా మాట్లాడారు. “నేను ఈరోజు నా అభిమానుల గురించి మాట్లాడాలి. వాళ్ళు నాకు దేవుడు ఇచ్చిన బహుమతి. నా సినిమాలు హిట్ అయినా, ఫ్లాప్ అయినా మీ ప్రేమ, నమ్మకం ఎప్పుడూ తగ్గలేదు. ఈసారి నాకు, నా అభిమానులకు కింగ్‌డమ్ సినిమాపై చాలా నమ్మకం ఉంది. ఈసారి సినిమా ఖచ్చితంగా హిట్ అవుతుందని మీరే చెబుతున్నారు. నా విజయాన్ని మీరు చూడాలని నాకు తెలుసు. నేను నటించే ప్రతి సినిమాకు నా శాయశక్తులు పెట్టి పనిచేస్తున్నాను” అని విజయ్ దేవరకొండ అన్నారు.

“మరో రెండు రోజుల్లో మనం థియేటర్‌లలో కలుద్దాం. జూలై 31న 'కింగ్‌డమ్' సినిమా విడుదల అవుతోంది. నా మనసులో చిన్న భయం, అనుమానం ఉన్నాయి. సినిమా మీకు నచ్చుతుందా అన్న ఆత్రుత కూడా ఉంది. దానితో పాటు, మేము మంచి సినిమా తీశామనే నమ్మకం కూడా ఉంది. ఇది కేవలం నా కింగ్‌డమ్ కాదు, ఇది గౌతమ్ తిన్ననూరి, అనిరుధ్ రవిచందర్ ల కింగ్‌డమ్ కూడా” అని విజయ్ దేవరకొండ పేర్కొన్నారు.

సినిమా సంగీత దర్శకుడు అనిరుధ్ రవిచందర్ మాట్లాడుతూ, “తెలుగు చిత్ర పరిశ్రమలో నాగ వంశీ నాకు గురువులాంటి వారు. నా పాటలు హిట్ అయినప్పుడు ఆయన చాలా సంతోషిస్తారు. నేను సినిమాను ఇప్పటికే చూశాను. అందరూ అద్భుతంగా నటించారు. ఈ సినిమా ఎడిటర్ నవీన్ నూలి భారతదేశంలోనే బెస్ట్ ఎడిటర్ అని నాకు అనిపిస్తుంది” అని అన్నారు.

'కింగ్‌డమ్' సినిమా జులై 31న విడుదల కానుంది. ఇది ఒక స్పై థ్రిల్లర్ కథ. ఈ సినిమాలో అన్నదమ్ముల మధ్య సెంటిమెంట్ కూడా ఉంటుంది. సినిమా ట్రైలర్ ఇప్పటికే విడుదలైంది. ఇందులో యాక్షన్ సీక్వెన్స్ లు చాలా ఆకట్టుకుంటున్నాయి. మొత్తంగా, ఈ సినిమా విజయ్ దేవరకొండకు, అభిమానులకు పెద్ద హిట్ ఇస్తుందని సినీ వర్గాలు ఆశిస్తున్నాయి.