హాలీవుడ్ రేంజ్ అంటే ఆయనది అంటున్న రానా

2018 లో సంచలనం సృష్టించిన హాలీవుడ్ సినిమాలలో అవెంజర్స్ కూడా ఒకటి. 'అవెంజర్స్ ఇన్ఫినిటీ వార్' అని టైటిల్తో ప్రేక్షకుల ముందుకు వచ్చిన ఈ సినిమాలో మార్వెల్ సూపర్ హీరోలందరూ ప్రేక్షకులను అలరించారు. త్వరలో ఈ చిత్రానికి సీక్వెల్ విడుదల కాబోతోంది. అసలే 'అవెంజర్స్ ఇన్ఫినిటీ వార్' క్లైమాక్స్ ప్రేక్షకులలో బోలెడు ప్రశ్నలను మిగిల్చింది. అందుకే ఈ చిత్రంపై భారీ అంచనాలు నెలకొన్నాయి. తాజాగా ఈ చిత్ర ట్రైలర్ తెలుగు వెర్షన్ రిలీజ్ అయింది. ఈ సినిమాలో ముఖ్య విలన్ ధానోస్ పాత్రకు డబ్బింగ్ చెప్పిన రానా స్వయంగా ట్రైలర్ ను విడుదల చేశారు.

ఈ సందర్భంగా మాట్లాడుతూ అవెంజర్స్ తో మీరు కూడా హాలీవుడ్లో సోలో సూపర్ హీరోగా నటిస్తున్నారా అని అడిగితే తనది హాలీవుడ్ రేంజ్ కాదని తాను కేవలం స్ట్రీట్ బాయ్ అని నవ్వేసారు రానా. అంతేకాక హాలీవుడ్ రేంజ్ అంటే ఆయనది అంటూ ఏ ఆర్ రెహమాన్ వైపు చూపించారు. ఇక తనకు అవెంజర్స్ సినిమా బాగా నచ్చుతుందని, సూపర్ హీరో సినిమాల్లో ఫిక్షన్ తను బాగా ఆకట్టుకుంటుందని, ఈ సినిమా లో ధానోస్ పాత్రకి వాయిస్ ఇచ్చే సమయంలో చాలా విషయాలను తెలుసుకున్నానని అన్నారు రానా. రానా లాంటి హీరో వాయిస్ అందించడం వల్ల సినిమా ఇమేజ్ పెరుగుతుంది అని మర్వెల్ సినిమా ప్రతినిధులు పేర్కొన్నారు.