Manam : అక్కినేని ఫ్యాన్స్‎కు గుడ్ న్యూస్..11ఏళ్ల తర్వాత జపాన్ లో రిలీజ్ కానున్న ‘మనం’

Manam : అక్కినేని అభిమానులకు గుడ్ న్యూస్. అక్కినేని కుటుంబంలోని మూడు తరాల నటులు కలిసి నటించిన అద్భుతమైన సినిమా మనం 11 ఏళ్ల తర్వాత జపాన్‌లో విడుదల కానుంది. 2014లో విడుదలైన ఈ సినిమా అప్పట్లో ఒక పెద్ద హిట్‌గా నిలిచింది. ఫైట్లు, భారీ డైలాగులు లేకుండానే ప్రేక్షకులను కదిలించిన ఈ సినిమా, లెజెండరీ నటుడు ఏఎన్ఆర్ చివరి సినిమాగా కూడా నిలిచింది. జపాన్‌లో నటుడు నాగార్జునకు భారీ ఫాలోయింగ్ ఉంది. రణబీర్ కపూర్ నటించిన బ్రహ్మాస్త్ర సినిమా జపాన్‌లో పెద్ద హిట్టయిన తర్వాత, అక్కడ నాగార్జున అభిమానులు ఆయనను నాగ సామా అని పిలుచుకుంటారు. జపనీస్ భాషలో సామా అంటే గౌరవపూర్వకంగా పిలిచే పదం. దీనికి 'దైవత్వానికి దగ్గరగా ఉన్నవాడు' అనే అర్థం కూడా ఉంది. ఈ క్రేజ్‌ను క్యాష్ చేసుకోవడానికే ఇప్పుడు మనం సినిమాను జపాన్‌లో విడుదల చేస్తున్నారు.

జపాన్‌లో గత కొన్ని దశాబ్దాలుగా భారతీయ సినిమాలు, ముఖ్యంగా సౌత్ సినిమాలు బాగా ఆడుతున్నాయి. రజనీకాంత్ అక్కడ ఒక పెద్ద స్టార్. ఇటీవల విడుదలైన మహారాజా, దేవర సినిమాలు భారీ బ్లాక్‌బస్టర్లుగా నిలిచాయి. అంతేకాకుండా, RRR, బాహుబలి వంటి సినిమాలు కూడా అక్కడ కలెక్షన్ల వర్షం కురిపించాయి. ఇప్పుడు ఈ లిస్ట్‌లో మనం సినిమా కూడా చేరనుంది.

మనం సినిమా ఒక మూడు తరాల కథ. ఈ మూడు పాత్రలలో అక్కినేని కుటుంబానికి చెందిన మూడు తరాల నటులు - అక్కినేని నాగేశ్వర రావు, ఆయన కొడుకు అక్కినేని నాగార్జున, నాగ చైతన్య - నటించడం ఈ సినిమాకు ఒక ప్రత్యేక ఆకర్షణ. ఈ సినిమాలో సమంత, శ్రియ శరణ్ హీరోయిన్‌లుగా నటించారు. నాగార్జున చిన్న కొడుకు అఖిల్ అక్కినేని కూడా ఈ సినిమాలో ఒక అతిథి పాత్రలో కనిపించారు. ఈ సినిమాకు విక్రమ్ కె కుమార్ దర్శకత్వం వహించారు. జపాన్ ప్రేక్షకులకు ఈ భావోద్వేగభరితమైన కుటుంబ కథనం బాగా నచ్చుతుందని చిత్రబృందం భావిస్తోంది.