Cobra Attack: 15 రోజుల తర్వాత అదే ఇంట్లో నాగుపాము ప్రత్యక్షం.. పగ తీర్చుకుందా?

ఉత్తరప్రదేశ్‌లోని ఎటా జిల్లాలో సినిమా సన్నివేశాలను తలపించే సంఘటన చోటుచేసుకుంది. శ్రావణ మాసంలో అలీగంజ్ పోలీస్ స్టేషన్ పరిధిలోని సరౌతియా గ్రామంలో ఓ కుటుంబం తమ ఇంట్లోకి వచ్చిన విషపూరిత నాగుపామును చంపింది. అయితే 15 రోజులకు ఆ కుటుంబానికి ఊహించని అనుభవం ఎదురైంది. చంపిన పాముకు జోడీగా ఉండే మరో నాగుపాము అదే ఇంట్లోకి చొరబడింది. 24 గంటల పాటు ఇంట్లోనే ఉండిపోయింది. పడగ ఎత్తి హిస్ శబ్దం చేస్తూ కదలకుండా ఉండటం అందరినీ షాక్‌కి గురిచేసింది.

ఈ సంఘటన ఊళ్లో ప్రచారం కావడంతో గ్రామస్థులు ఆ ఇంటి వద్దకు చేరుకొని పామును తిలకించారు. ఆ కుటుంబం నిద్రలేక రాత్రి గడిపింది. అటవీ శాఖ అధికారులకు సమాచారం ఇవ్వడంతో వారు ఘటనా స్థలానికి చేరుకొని, గంటలపాటు శ్రమించి పామును సురక్షితంగా రెస్క్యూ చేశారు.

పాము ఎందుకు అక్కడే స్థిరంగా ఉండిపోయిందో ఎవరికీ అర్థం కాలేదు. అటవీ శాఖ మాత్రం ఇది ఆహారాన్వేషణలో భాగమే కావచ్చని అభిప్రాయపడింది. కానీ స్థానికులు మాత్రం ఇది పగ తీర్చుకోవడమేనని భావిస్తున్నారు. వారి అభిప్రాయం ప్రకారం, చంపబడిన జోడీ కోసం ఆ పాము నిరీక్షిస్తూ అక్కడే తిష్ట వేసిందని అంటున్నారు.

పాముల నిపుణుల ప్రకారం, నాగుపాములు దాడి చేసేందుకు సిద్ధంగా ఉన్నప్పుడు చుట్ట చుట్టుకొని, ఒకే చోట కదలకుండా ఉంటాయి. దాంతో శత్రుపై ఒక్కసారిగా ఉరిగేందుకు ఎక్కువ బలం పెరుగుతుందని చెబుతున్నారు. ఇదే తరహా భంగిమలో ఆ పాము కనిపించిందని చెప్పారు.

ఈ సంఘటనతో ఆ గ్రామంలో పెద్ద చర్చే నడుస్తోంది. ఆ ఇంట్లో పాముకి గుడి కట్టాలా అని గ్రామస్తులు ఆలోచిస్తున్నారు. కొందరైతే ఇది దైవలీలగా భావిస్తున్నారు. అయితే, వర్షాకాలంలో ఇలాంటి సంఘటనలు ఎక్కువగా జరుగుతుంటాయని, పాములు నివాస ప్రాంతాల్లోకి రావడం సహజమేనని నిపుణులు చెబుతున్నారు.

గమనించాల్సింది ఏమిటంటే – ఒక పామును చంపినప్పటికీ, రెండవ పామును చంపకుండా అటవీ అధికారులకు సమాచారం ఇచ్చిన ఆ కుటుంబం బాధ్యతాయుతంగా వ్యవహరించింది. ఇలాగే మన ఇళ్లలో పాము కనిపించినా దాన్ని చంపకుండా వెంటనే స్నేక్ రెస్క్యూ టీమ్‌కి సమాచారం ఇవ్వడం మంచిదని నిపుణులు సూచిస్తున్నారు.