Sunita Williams: సునీతా విలియమ్స్ 9 నెలల అంతరిక్ష ప్రయాణం కారణంగా ఆమె ఆరోగ్యం దెబ్బతింటుందా?

Sunita Williams: ప్రఖ్యాత వ్యోమగామి సునీతా విలియమ్స్ తొమ్మిది నెలల పాటు అంతర్జాతీయ అంతరిక్ష కేంద్రం (ISS)లో గడిపారు. అంతరిక్ష జీవితం అనుభవంలో అద్భుతమైనదే అయినా దీర్ఘకాలం స్పేస్‌లో ఉండటం శరీరంపై కొన్ని ఆరోగ్య సమస్యలను కలిగించవచ్చు. గురుత్వాకర్షణ లేని వాతావరణంలో గడిపిన కారణంగా, ఆమె ఎముకల బలహీనత, కండరాల నరాల ప్రభావం, రక్త ప్రసరణ మార్పులు వంటి సమస్యలను ఎదుర్కొనే అవకాశం ఉంది.

అంతరిక్షంలో గురుత్వాకర్షణ లేకపోవడం వల్ల ఎముకల దృఢత తగ్గిపోతుంది, దీంతో భూమికి వచ్చిన తర్వాత నడవడం, నిలబడడం కొంతకాలం కష్టంగా అనిపించవచ్చు. అలాగే, రక్త ప్రసరణ మార్పుల కారణంగా.. ముఖం కాస్త ఉబ్బిపోయే అవకాశం ఉంటుంది. కొంతమందికి తలనొప్పి, ఒత్తిడితో కూడిన సమస్యలు కూడా ఎదురవుతాయి. అంతేకాకుండా, సూర్యుడి కిరణాలు, అంతరిక్ష రేడియేషన్ ప్రభావం కూడా ఎక్కువగా ఉంటాయి, దీని వల్ల దూరదృష్టి సమస్యలు తలెత్తవచ్చు.

ఈ సమస్యలను తగ్గించేందుకు, సునీతా విలియమ్స్ భూమికి వచ్చిన తర్వాత ఫిజియోథెరపీ, వ్యాయామం ద్వారా శరీరాన్ని మళ్లీ సాధారణ స్థితికి తెచ్చుకునే ప్రయత్నం చేయాల్సి ఉంటుంది. ఇది కేవలం సునీతా విలియమ్స్‌కే కాదు, అంతరిక్షంలో ఎక్కువ రోజులు గడిపిన ప్రతి వ్యోమగామికి వర్తించే అంశం. భూమికి తిరిగి వచ్చాక పూర్తిగా అనుకూలం కావడానికి కొన్ని వారాలు పట్టవచ్చు, కానీ శాస్త్రవేత్తల పర్యవేక్షణలో ఆమె మళ్లీ ఆరోగ్యంగా మారుతారని నిపుణులు చెబుతున్నారు.