Plane Crash: కజకిస్తాన్‎ విమాన ప్రమాదంలో కుట్రకోణం? ఫ్లైట్‌పై బుల్లెట్ల రంధ్రాలతో అనుమానాలు..

Plane Crash: అజర్‌బైజన్ ఎయిర్‌లైన్స్‌కు చెందిన జె2-8243 విమానం కుప్పకూలడంతో 38 మంది మరణించారు. ఈ ప్రమాదానికి సంబంధించిన వీడియోలు సోషల్ మీడియాలో వైరల్‌గా మారాయి. ఈ క్రమంలో విమాన ప్రమాదంలో కుట్ర కోణం ఉన్నట్టు వార్తలు వినిపిస్తున్నాయి. అజర్‌బైజన్‌లోని బాకు నగరం నుంచి రష్యాలోని చెచెన్ ప్రాంతానికి చెందిన గ్రోజ్నికి ప్రయాణిస్తుండగా.. కజకిస్థాన్‌లోని ఆక్టావ్‌లో ఈ విమానం కూలిపోయింది.

పక్షి ఢీ కొట్టడంతో పైలట్ ఎమర్జెన్సీ ల్యాండింగ్‌కు ట్రై చేస్తుండగా ప్రమాదం జరిగిందని రష్యా ఏవియేషన్ వెల్లడించింది. కానీ ప్రమాద దృశ్యాలను చూసిన నెటిజన్లు పలు అనుమానాలను వ్యక్తం చేస్తున్నారు. ఫ్లైట్ కూలిన సమయంలో రష్యా-ఉక్రెయిన్‌ మధ్య దాడులు జరగడమే అందుకు కారణంగా భావిస్తున్నారు. దానిని కీవ్‌కు చెందిన డ్రోన్‌గా భావించడం వల్లే రష్యా ఎయిర్ డిఫెన్స్ వ్యవస్థ కూల్చివేసినట్టు భావిస్తున్నారు.

ఉక్రెయిన్ డ్రోన్ దాడులను రష్యా తిప్పికొడుతున్న తరుణంలోనే పైలట్ అప్రమత్తమై ఓ కాల్ పంపించారని కొన్ని మీడియా సంస్థలు కథనాలు పేర్కొన్నాయి. కొన్ని చిత్రాల్లో విమానం బాడీపై బుల్లెట్లు ఉన్న ఆనవాళ్లు కనిపించినట్టు తెలిపాయి. అయితే ఈ కథనాలపై కజకిస్థాన్ డిప్యూటీ ప్రధానిని మీడియా ప్రశ్నించిగా.. సరైన సమాధానం చెప్పలేదు.

ఇదిలా ఉంటే నిన్న క్రిస్మస్ పండగ సమయంలోనూ ఉక్రెయిన్‌పై రష్యా దాడులు కొనసాగించింది. ఆ దేశంలోని పలు విద్యుత్తు కేంద్రాలపై 70కి పైగా క్షిపణులు, 100కు పైగా డ్రోన్లతో దాడులు చేసింది. ఉక్రెయిన్ అధ్యక్షుడు జెలెన్‌స్కీ స్వయంగా ఈ వివరాలను వెల్లడించారు. రష్యా ప్రయోగించిన వాటిలో బాలిస్టిక్ మిస్సైల్స్ కూడా ఉన్నాయని తెలిపారు. తాము కనీస 50 క్షిపణులను, పలు డ్రోన్లను కూల్చివేసినట్టు తెలిపారు. రష్యా అధ్యక్షుడు పుతిన్ ఉద్దేశపూర్వకంగానే క్రిస్మస్ రోజున భీకర దాడులు జరిపించారని జెలెన్‌స్కీ ఆరోపించారు.