Klein Vision AirCar: గాల్లో ఎగిరే కారు.. 2 నిమిషాల్లోనే కారు విమానంగా మారుతుంది.. చూడండి ఎలా ఎగురుతుందో..!

Klein Vision AirCar: ప్రపంచవ్యాప్తంగా ఎగిరే కార్ల గురించి చర్చలు జరుగుతున్నాయి. అనేక పెద్ద ఆటోమొబైల్, టెక్ కంపెనీలు ఈ టెక్నాలజీపై పనిచేస్తున్నాయి. వీటిని కారు లాగా రోడ్డుపై నడపడంతో పాటు, అవసరమైతే గాలిలోకి కూడా తీసుకెళ్లచ్చు. అలాంటి స్లోవేకియన్ స్టార్టప్ క్లీన్ విజన్ దాని మొదటి ఎగిరే కారు/ఎయిర్ కారు ప్రొడక్షన్ రెడీ ప్రోటోటైప్‌ను కూడా ప్రదర్శించింది. దీని గురించి ఆ స్టార్టప్ వచ్చే ఏడాది నాటికి దీనిని మార్కెట్లోకి విడుదల చేస్తామని పేర్కొంది.

క్లీన్ విజన్ గత మూడు దశాబ్దాలుగా దాని 'ఎయిర్‌కార్'పై పనిచేస్తోంది. ఈ కారు ప్రోటోటైప్ ఉత్పత్తికి సిద్ధంగా ఉన్న మోడల్‌ను చేరుకోవడానికి ముందు 170 కంటే ఎక్కువ ఫ్లయింగ్ అవర్స్, 500 కంటే ఎక్కువ టేకాఫ్‌లు, ల్యాండింగ్‌లను పూర్తి చేసిందని కంపెనీ తెలిపింది. 2022 సంవత్సరంలో, ఈ మోడల్ ఫ్లయింగ్ సర్టిఫికేట్ పొందింది.

క్లీన్ విజన్ ఎయిర్‌కార్ ధర

క్లీన్ విజన్ ఎయిర్‌కార్ వచ్చే ఏడాది మార్కెట్లోకి రానుంది. గత వారం బెవర్లీ హిల్స్‌లో జరిగిన లివింగ్ లెజెండ్స్ ఆఫ్ ఏవియేషన్ గాలా డిన్నర్ సందర్భంగా కంపెనీ ఈ ఎగిరే కారు నమూనాను ఆవిష్కరించింది. ఈ సందర్భంగా, కంపెనీ ప్రతినిధి ఈ ఎగిరే కారును వచ్చే ఏడాది అమ్మకానికి విడుదల చేయనున్నట్లు ధృవీకరించారు. దీని ధర దాదాపు 8 లక్షల నుండి 10 లక్షల డాలర్లు USD (సుమారు రూ. 6.78 కోట్ల నుండి రూ. 8.47 కోట్లు) ఉంటుంది.

2 నిమిషాల్లో కారు నుండి విమానం

ఇది కన్వర్టిబుల్ ఎయిర్‌కార్ అని క్లీన్ విజన్ చెబుతోంది. ఇది సాధారణ వాహనంలా రోడ్డుపై సులభంగా దూసుకెళ్లగలదు, అవసరమైతే ఎగిరే విమానంగా కూడా మారగలదు. సాధారణ కారు నుండి విమానంగా మారడానికి కేవలం 2 నిమిషాలు మాత్రమే పడుతుంది. ఇదంతా ఆటోమ్యాటిక్‌గా జరుగుతుంది.

ఈ ఎయిర్‌కార్ ఎలా పని చేస్తుంది?

క్లీన్ విజన్ తన జెట్సన్ లాంటి వాహనం నాలుగు చక్రాల కారు నుండి ఫిక్సిడ్-వింగ్ విమానంగా రెండు నిమిషాల కంటే తక్కువ సమయంలో మారుతుందని పేర్కొంది. ఫ్లయింగ్ మోడ్ నుండి డ్రైవింగ్ మోడ్‌కు మారిన వీడియోలో దీనిని చూపించారు. దీనిలో కారు నుండి రెక్కలు ఎలా బయటకు వస్తాయో మీరు చూడవచ్చు. ఇది కొంతవరకు హార్డ్‌టాప్ కన్వర్టిబుల్ లాగా కనిపిస్తుంది. ఒకసారి ఫ్లయింగ్ మోడ్‌లోకి వెళ్లిన తర్వాత, అది స్పాయిలర్, ఎలివేటర్ పిచ్‌ని ఉపయోగించి డౌన్‌ఫోర్స్‌ను ఉత్పత్తి చేస్తుంది.

ఎయిర్‌కార్ స్పీడ్ ఎంత?

కంపెనీ తన తాజా వేరియంట్ రోడ్డుపై గంటకు 200 కి.మీ వేగంతో, గాలిలో గంటకు 250 కి.మీ వేగంతో ఎగురుతుందని చెబుతోంది. దీని గరిష్ట విమాన పరిధి 1000 కిలోమీటర్లు. అంటే, ఈ ఎయిర్‌కార్ ఒకసారి టేకాఫ్ అయిన తర్వాత 1000 కి.మీ వరకు సులభంగా ప్రయాణించగలదు. ఇది కాకుండా, కారు పరిధి 800 కి.మీ. దీనికి 280 హార్స్‌పవర్ మోటారు ఉంది.

ఎయిర్‌కార్ వేరియంట్లు

ఈ ఎయిర్‌కార్ వివిధ వెర్షన్లపై కంపెనీ పనిచేస్తోంది. అయితే, రెండు సీట్ల వెర్షన్‌ను ముందుగా పరిచయం చేస్తారు. దీనితో పాటు, 4-సీటర్ వెర్షన్, ట్విన్ ఇంజిన్ వెర్షన్, యాంఫిబియస్ వెర్షన్ కూడా కంపెనీ పోర్ట్‌ఫోలియోలో ఉంటాయి. ఈ యాంఫిబిస్ వెర్షన్ చాలా ప్రత్యేకంగా ఉంటుంది, ఇది రోడ్డుపై వెలుతుంది, గాలిలో ఎగురుతుంది, కానీ ఈ వెర్షన్ నీటి ఉపరితలంపై కూడా పరిగెత్తగల సామర్థ్యాన్ని కలిగి ఉంటుంది.