Hyundai Creta: క్రెటా కొనే ముందు కాస్త ఆగండి.. లీటరుకు 25కిమీ మైలేజ్ ఇచ్చే హైబ్రిడ్ మోడల్ వస్తోంది

Hyundai Creta: హ్యుందాయ్ క్రెటా కొనాలని చూస్తున్నారా.. అయితే కొంచెం ఆగండి. క్రెటాకు మార్కెట్‌లో ఉన్న డిమాండ్ అంతా ఇంతా కాదు. ఇది హ్యుందాయ్ కంపెనీలో అత్యధికంగా అమ్ముడవుతున్న కారు, అంతేకాదు, ఎస్‌యూవీ విభాగంలో దేశంలోనే నంబర్ 1. ముఖ్యంగా దీని ఎలక్ట్రిక్ మోడల్ వచ్చిన తర్వాత దీని అమ్మకాలు మరింత పెరిగాయి. ప్రస్తుతం రెండవ జనరేషన్‌లో ఉన్న క్రెటా, ఇప్పుడు మూడవ జనరేషన్ మోడల్‌ను తీసుకురావడానికి సిద్ధమవుతోంది. ఇది 2027లో లాంచ్ అయ్యే అవకాశం ఉంది. ఈ కొత్త మోడల్‌కు 'SX3' అనే కోడ్‌నేమ్ ఇచ్చారు. ఇందులో ప్రత్యేకంగా హైబ్రిడ్ పవర్‌ట్రెయిన్ ఉండబోతుంది. ఇది అద్భుతమైన మైలేజ్ ఇస్తుందని అంటున్నారు.

హ్యుందాయ్ క్రెటా రెండవ జనరేషన్ మోడల్ జనవరి 2024లో విడుదలైంది. అయితే, కంపెనీ ఇప్పటికే కొత్త జనరేషన్ క్రెటా డెవలప్‌మెంట్‌ను మొదలుపెట్టింది. ఇది 2027లో లేదా 2028 ప్రారంభంలో లాంచ్ కావచ్చని అంచనా. మూడవ జనరేషన్ క్రెటాలోని ముఖ్య విషయం ఏంటంటే.. ఇది భారతదేశంలో హ్యుందాయ్ మొదటి హైబ్రిడ్ కాంపాక్ట్ ఎస్‌యూవీ అవుతుంది.

ఈ హైబ్రిడ్ ఇంజిన్ కియా సెల్టోస్ రెండవ జనరేషన్‌లో కూడా ఉండే అవకాశం ఉంది. ఈ హైబ్రిడ్ ఇంజిన్ టెస్టింగ్ ఇప్పటికే మొదలైంది. హ్యుందాయ్ గ్రూప్ ఈ కొత్త హైబ్రిడ్ పవర్‌ట్రెయిన్ ఒక సెల్ఫ్-ఛార్జింగ్ హైబ్రిడ్ సెటప్ అని చెబుతున్నారు. ఇది ప్రస్తుతం ఉన్న 1.5-లీటర్ 4-సిలిండర్ నేచురల్లీ ఆస్పిరేటెడ్ (NA) పెట్రోల్ ఇంజిన్‌పై ఆధారపడి ఉంటుంది. ఇందులో టార్క్ అందించడానికి ఒక ఎలక్ట్రిక్ మోటార్ కూడా ఉంటుంది. ఇది స్టార్టర్, జనరేటర్‌గా పనిచేయొచ్చు.

ఈ సెటప్‌లో ఒక చిన్న బ్యాటరీ ప్యాక్ ఉంటుంది. ఇది రీ-ప్రొడ్యూస్ అయిన ఎనర్జీని స్టోర్ చేస్తుంది. తక్కువ వేగంతో నడిచేటప్పుడు ఇది చిన్న ఈవీ రేంజ్‌ను అందిస్తుంది. సాధారణంగా, దీని మైలేజ్ చాలా ఎక్కువగా ఉంటుంది. నగరంలో డ్రైవింగ్ చేసేటప్పుడు దాదాపు 10శాతం, హైవేపై దాదాపు 5శాతం మైలేజ్ పెరగవచ్చని అంచనా. ప్రస్తుతం ఉన్న డీజిల్ మోడల్ మైలేజ్ లీటరుకు 21.8 కిలోమీటర్లు కాగా, ఇది లీటరుకు 25 కిలోమీటర్లు వరకు పెరిగే అవకాశం ఉంది.

హ్యుందాయ్ క్రెటాకు ఇప్పటికే 1.5 లీటర్ ఇంజిన్‌లు (1.5 లీటర్ NA పెట్రోల్, 1.5 లీటర్ టర్బో పెట్రోల్, 1.5 లీటర్ టర్బో డీజిల్) ఉన్నాయి. ఈ కొత్త హైబ్రిడ్ పవర్‌ట్రెయిన్ నాలుగో ఆప్షన్‌గా వస్తుంది. ఈ హైబ్రిడ్ ఇంజిన్ ముందుగా హ్యుందాయ్ కొత్త మిడ్-సైజ్ ఎస్‌యూవీలో ప్రారంభమవుతుంది. ఇది అల్కాజార్‌కి పైన, టక్సన్‌కి కింద స్థానంలో ఉంటుంది.

హ్యుందాయ్ క్రెటా ఎలక్ట్రిక్ కోసం కూడా ఒక ఫేస్‌లిఫ్ట్ తీసుకురావాలని ప్లాన్ చేస్తోంది. ఇది కూడా దాదాపు అదే సమయంలో లాంచ్ కావచ్చు. హైబ్రిడ్ క్రెటా మార్కెట్‌లోకి వస్తే ఇది ప్రధానంగా మారుతి సుజుకి గ్రాండ్ విటారా, టయోటా అర్బన్ క్రూజర్ హైడర్, రాబోయే రెనో డస్టర్ హైబ్రిడ్‌కు గట్టి పోటీ ఇస్తుంది.