Bajaj: బజాజ్ నుండి కొత్త 125సీసీ బైక్.. లక్షలోపే స్టైలిష్ బైక్

Bajaj: బజాజ్ ఆటో (Bajaj Auto) త్వరలో కొత్త 125సీసీ మోటార్‌సైకిల్‌ను (125cc Motorcycle) విడుదల చేయబోతోంది. మీడియా నివేదికల ప్రకారం.. బజాజ్ 125సీసీ బైకుల మార్కెట్‌లో తమ పట్టును మరింత పెంచుకోవాలని చూస్తోంది. ప్రస్తుతం ఈ సెగ్మెంట్‌లో పల్సర్ 125, పల్సర్ ఎన్ఎస్125, పల్సర్ ఎన్125, సీఎన్‌జీతో నడిచే ఫ్రీడమ్ 125 వంటి బైకులు బజాజ్ నుండి అందుబాటులో ఉన్నాయి.

బజాజ్‌కు 125సీసీ బైకులే ఆధారం

బజాజ్ మొత్తం బైక్ అమ్మకాల్లో దాదాపు 40శాతం కేవలం 125సీసీ బైకుల నుంచే వస్తుంది. అందుకే, కొత్త మోడల్‌ను తీసుకురావడం ద్వారా బజాజ్ మరింత మంది కస్టమర్లను ఆకర్షించాలని చూస్తోంది. 2026 నాటికి 125సీసీ సెగ్మెంట్ 8-12శాతం పెరగొచ్చని బజాజ్ అంచనా వేస్తోంది. ఈ కొత్త బైక్ టీవీఎస్ రెడర్ (TVS Raider) , హోండా షైన్ (Honda Shine) వంటి వాటికి గట్టి పోటీ ఇవ్వగలదు.

కొత్త బైక్ వివరాలు

కొత్త బైక్ గురించి ఇంకా పూర్తి వివరాలు తెలియలేదు. కానీ, దీనిని పల్సర్ బ్రాండ్ (Pulsar Brand) కిందే విడుదల చేస్తారని భావిస్తున్నారు. కొన్ని నివేదికల ప్రకారం.. బజాజ్ తన పాత సీటీ125ఎక్స్ (CT125X) బైక్‌ను కొత్త రూపంలో తిరిగి తీసుకురావచ్చని చెబుతున్నారు. ఈ బైక్ ముఖ్యంగా తక్కువ బడ్జెట్‌లో బైక్ కొనాలనుకునే కస్టమర్‌ల కోసం ఉద్దేశించినది. ప్రస్తుతం 125సీసీ+ సెగ్మెంట్‌లో బజాజ్ రెండో స్థానంలో ఉంది, మొదటి స్థానంలో హోండా (Honda) ఉంది. ఈ రెండింటి మధ్య దాదాపు 5-6% తేడా ఉంది. కొత్త బైక్ ద్వారా ఈ తేడాను తగ్గించుకోవాలని బజాజ్ ప్రయత్నిస్తోంది.

మీడియా రిపోర్ట్స్ ప్రకారం, బజాజ్ రాబోయే కాలంలో 125సీసీ, 150-160సీసీ స్పోర్టీ బైక్‌లపై (Sporty Bikes) ఎక్కువ దృష్టి పెడుతుందని చెప్పింది. ప్రస్తుతం దాని 150సీసీ, 160సీసీ సెగ్మెంట్ బైకులలో పల్సర్ 150, ఎన్150, ఎన్ఎస్160, ఎన్160 వంటివి ఉన్నాయి. 2021 ఆర్థిక సంవత్సరం (FY 2021) నుండి 2024 ఆర్థిక సంవత్సరం (FY 2024) మధ్య బజాజ్ మార్కెట్ వాటా 5.5% పెరిగి 25.5%కి చేరుకుంది. కానీ 2025 ఆర్థిక సంవత్సరంలో ఇది కొద్దిగా తగ్గి 24%కి వచ్చింది. ఇప్పుడు కంపెనీ కొత్త బైక్‌ను విడుదల చేసి మళ్లీ తన మార్కెట్ వాటాను పెంచుకోవాలని చూస్తోంది. ఈ కొత్త బైక్ ధర సుమారు రూ.1 లక్ష (ఎక్స్-షోరూమ్) ఉండవచ్చని అంచనా వేస్తున్నారు.