నిలిచిపోయిన సబ్సిడీ ఉల్లి సరఫరా..

శ్రీకాకుళం జిల్లాలో గత మూడు రోజులుగా సబ్సిడీపై అందిస్తున్న ఉల్లి సరఫరా నిలిచిపోయింది. సోమవారం వరకూ కొనసాగిన సరఫరా ఒక్కసారిగా నిలిచిపోయింది. దాంతో మధ్యతరగతి ప్రజలు తీవ్ర ఇబ్బందులు ఎదుర్కొంటున్నారు. కొంతమంది అయితే రైతుబజార్లో ఉల్లిపాయల అయిపోయినా మళ్ళీ వస్తాయేమోనన్న ఉద్దేశ్యంతో క్యూలో గంటల తరబడి వేచి ఉంటున్నారు. కాగా ధర కిలోకు రూ .100 కు చేరినప్పుడు.. ప్రభుత్వం సబ్సిడీపై ఉల్లిపాయలను సరఫరా చేయడం ప్రారంభించింది. గత నెల నవంబర్ 24 నుండి జిల్లాలోని రైతు బజార్లలో కిలోకు రూ .25 చొప్పున సబ్సిడీతో విక్రయిస్తున్నారు. శ్రీకాకుళం జిల్లాలో మొదట్లో శ్రీకాకుళం, అముదాలవలస, కోటబోమ్మాలి రైతు బజార్లలో సబ్సిడీ ఉల్లిపాయల సరఫరా ప్రారంభమైంది.

ఆ తరువాత శ్రీకాకుళం జిల్లా వ్యాప్తంగా బుడుమూరు, పాండురు, రాజాం, పాలకొండ, పాతపట్నం, హిరమండలం, నరసన్నపేట, జలుమురు, పలాస, కాంచిలి, ఇచ్చాపురంలోని 11 ఎఎంసిలలో ఉల్లి సరఫరా జరిగింది. అయితే ప్రస్తుతం జిల్లాలో ఉల్లి నిల్వలు అందుబాటులో లేవు.. పైగా స్టాక్స్ ఎప్పుడు వస్తాయో కూడా స్పష్టమైన సమాచారం లేదని.. మార్కెటింగ్ అసిస్టెంట్ డైరెక్టర్ (ఎడి) బి శ్రీనివాస రావు చెప్పారు. శ్రీకాకుళం నగరవాసులు ఎం స్వాతి, సి సంజీవి, టి అనురాధ, ఎల్ శ్రీదేవి, సబ్సిడీ ఉల్లిపాయ లభించకపోవడంతో తాము తీవ్ర ఇబ్బందులు చెందుతున్నామని చెబుతున్నారు. ప్రభుత్వం వెంటనే జోక్యం చేసుకొని సబ్సిడీ ఉల్లిపాయలు అందించాలని కోరుతున్నారు. మరోవైపు ఉల్లిపాయలు వస్తాయేమోనని గంటల తరబడి క్యూ లైన్లను వేచి ఉంటున్నారు.