రేపు మరో అల్పపీడనం

ఉపరితల ఆవర్తనం ప్రభావంతో తెలుగు రాష్ట్రాల్లో వర్షాలు కురుస్తున్నాయి. రేపు అల్పపీడనం ఏర్పడే అవకాశం ఉంది. దీని ప్రభావంతో మధ్యభారతంతో పాటు ఆంధ్రప్రదేశ్‌, తెలంగాణల్లో వర్షాలు విస్తారంగా కురిసే అవకాశం ఉంది.

అల్పపీడన ప్రభావంతో తెలుగు రాష్ట్రాల్లో విస్తారంగా వర్షాలు కురుస్తున్నాయి. మరో నాలుగు రోజుల పాటు తేలికపాటి వర్షాలు కురుస్తాయని హైదరాబాద్ వాతావరణ కేంద్రం వెల్లడించింది. శుక్రవారం తెలంగాణ వ్యాప్తంగా తేలికపాటి నుంచి ఓ మోస్తరు వర్షం కురిసింది. శనివారం ఒకట్రెండు చోట్ల భారీ నుంచి అతి భారీ వర్షాలు కురుస్తాయని ప్రకటించింది. ఆదివారం అల్పపీడనం ఏర్పడే అవకాశం ఉందని పేర్కొంది. దీంతో పాటు ఈనెల 4న ఈశాన్య బంగాళాఖాతంలో అల్పపీడనం ఏర్పడే అవకాశం ఉందని హెచ్చరించారు. ఇది మరింత తీవ్రంగా మారి పశ్చిమ దిశగా పయనిస్తే దీని ప్రభావం తెలుగు రాష్ట్రాలపై ఎక్కువగా ఉంటుందని చెబుతున్నారు. హైదరాబాద్‌లో కురుస్తున్న వర్షాలపై జీహెచ్ఎంసీ అప్రమత్తమైంది. శనివారం జోనల్, డిప్యూటీ కమిషనర్లు నగరంలో తిరిగి పరిస్థితిని పర్యవేక్షించాలని ఆదేశాలు జారీ చేశారు. అధికారులు సెలవులు రద్దు చేసుకుని అందుబాటులో ఉండాలని కోరింది జీహెచ్ఎంసీ.

ఉత్తర కోస్తా, దాని పరిసర ప్రాంతాల్లో నాలుగు పాయింట్ ఐదు కిలో మీటర్ల ఎత్తు వరకు ఉపరితల ఆవర్తనం ఏర్పడింది. ఉత్తరాంధ్ర, ఉభయ గోదావరి జిల్లాలల్లో భారీ వర్షాలు కురుస్తాయని ఆర్టీజీఎస్ ప్రకటించింది. ఈనెల 5వ తేదీ వరకు దీని తీవ్ర ప్రభావం చూపుతుందని తెలిపింది. గంటకు 50 నుంచి 70 మీటర్ల వేగంతో గాలులు వీచే సూచనలున్నట్లు పేర్కొంది. సముద్రం అల్లకల్లోలంగా ఉంటుందని అలలు 4మీటర్ల ఎత్తు వరకు ఎగసి పడుతుంటాయని తెలిపింది. తూర్పు గోదావరి, విశాఖపట్నం జిల్లాల్లో అత్యధిక వర్షపాతం నమోదయ్యే అవకాశమందని ప్రకటించింది ఆర్టీజీఎస్. రాయలసీమలో మాత్రం వర్షపాతం తక్కువగా నమోదు అవుతుంది. రాగల రెండు రోజుల్లో అక్కడక్కడ తేలికపాటి నుంచి మోస్తారు వర్షాలు కురిసే అవకాశం ఉంది. ఎడతెరిపిలేకుండా కురుస్తున్న వర్షాలతో లోతట్టు ప్రాంతాల ప్రజలు అప్రమత్తంగా వుండాలని, మత్స్యకారులు చేపలు పట్టడానికి వెళ్లరాదని వాతావరణ శాఖ హెచ్చరించింది.