BITS Pilani in AP: అమరావతిలో బిట్స్ క్యాంపస్.. ₹1000 కోట్లతో ఏర్పాటుకు కసరత్తు ప్రారంభం!

ఆంధ్రప్రదేశ్‌కు మరో ప్రతిష్టాత్మక విద్యాసంస్థ రాబోతోంది. దేశంలోనే పేరుపొందిన బిర్లా ఇన్‌స్టిట్యూట్ ఆఫ్ టెక్నాలజీ అండ్ సైన్స్ (BITS Pilani) ఇప్పుడు ఏపీ రాజధాని అమరావతిలో తన కొత్త క్యాంపస్‌ను ఏర్పాటు చేయడానికి ముందుకొచ్చింది. ఈ క్యాంపస్ కోసం రూ. 1000 కోట్ల పెట్టుబడితో 35 ఎకరాల విస్తీర్ణంలో నిర్మాణ పనులు చేపట్టనున్నారు.

యూనివర్సిటీ ఛాన్సలర్ మరియు బిర్లా గ్రూప్ ఛైర్మన్ కుమార్ మంగళం బిర్లా ప్రకారం, ఈ క్యాంపస్‌ను ప్రధానంగా ఆర్టిఫిషియల్ ఇంటెలిజెన్స్ (AI) కేంద్రంగా అభివృద్ధి చేయనున్నారు. 2027 నాటికి పూర్తిస్థాయిలో తరగతులు ప్రారంభించి, రెండు విడతల్లో మొత్తం 7000 మంది విద్యార్థులను చేర్చుకోవాలని లక్ష్యంగా పెట్టుకున్నారు.

ఈ క్యాంపస్‌లో అండర్ గ్రాడ్యుయేట్ (డిగ్రీ) మరియు మాస్టర్స్ ప్రోగ్రామ్స్ అందించనున్నారు. ముఖ్యంగా ఆర్టిఫిషియల్ ఇంటెలిజెన్స్, మెషిన్ లెర్నింగ్, ఇన్నోవేషన్, స్ట్రాటజీ వంటి ఆధునిక, డిమాండ్‌లో ఉన్న కోర్సులపై దృష్టి సారించనున్నారు.

ఇప్పటికే IBM, TCS, L&T వంటి దిగ్గజ కంపెనీలు అమరావతిలో క్వాంటం వ్యాలీని ఏర్పాటుచేయాలన్న ప్రణాళికలో ఉన్న సమయంలో, బిట్స్ పిలానీ క్యాంపస్‌కు సంబంధించిన ఈ ప్రకటన రాష్ట్రానికి విద్యా రంగంలో మరింత గౌరవం తీసుకురానుందని చెప్పవచ్చు.

ఈ కొత్త విద్యా కేంద్రం వల్ల నైపుణ్యాలు పెరిగే విద్యార్థుల సంఖ్య పెరగడమే కాదు, అమరావతిలోని ఐటీ, ఇన్నోవేషన్ రంగాలు మరింత బలోపేతం కావడం ఖాయం.