చంద్రబాబు ధర్మపోరాట దీక్ష ఖర్చుపై హైకోర్టు ఆశ్చర్యం.. ఏపీ ప్రభుత్వానికి నోటీసులు

కేంద్రం అన్యాయం చేసిందని అప్పటి ఆంధ్రప్రదేశ్ ముఖ్యమంత్రి చంద్రబాబునాయుడు ధర్మపోరాటం పేరుతో దీక్షలు నిర్వహించిన సంగతి తెలిసిందే. ఈ ఏడాది ఫిబ్రవరి 11న చంద్రబాబు ఆధ్వర్యంలో ఢిల్లీలో ఒక్కరోజు 'ధర్మ పోరాట దీక్ష' జరిగింది. అయితే, ఈ కార్యక్రమానికి రూ. 10 కోట్లు ఖర్చు చేశారని.. ఇదంతా ప్రజల సొమ్మని సవాల్ చేస్తూ తూర్పుగోదావరి జిల్లాకు చెందిన వేటుకూరి సూర్యనారాయణరాజు అనే వ్యక్తి హైకోర్టులో పిల్ వేశారు. దీన్ని గురువారం హైకోర్టు విచారించింది. ఈ సందర్బంగా ఇంత మేర ఖర్చు కావడంపై ఏపీ హైకోర్టు ఆశ్చర్యాన్ని వ్యక్తం చేసినట్టు అతను తెలిపాడు.

ఈ పిల్ పై విచారణ సందర్భంగా, పిటిషనర్ తరపు న్యాయవాది టీడీపీ పార్టీ లబ్ధి కోసం ఈ దీక్షను చేపట్టారని, దీనికి ప్రజాధనాన్ని భారీ ఎత్తున దుర్వినియోగం చేయడం ఏంటని వాదించారు.. దీనికి రూ. 10 కోట్లను కేటాయిస్తూ జీవో జారీ చేసిన అధికారి ఎవరని హైకోర్టు ప్రశ్నించింది. ఏ నిబంధనల మేరకు ఈ నిధులను విడుదల చేశారని అడిగింది. ఇంత భారీ స్థాయిలో ఏమి ఖర్చులు చేశారని ప్రశ్నిస్తూ.. పూర్తి వివరాలను తమ ముందు ఉంచాలని వైసీపీ ప్రభుత్వానికి నోటీసులు ఇచ్చింది. అనంతరం తదుపరి విచారణను నవంబర్ 21వ తేదీకి వాయిదా వేసినట్టు తెలుస్తోంది.