AP Cabinet Approves New Districts Formation Committee: ఏపీలో కొత్త జిల్లాల ఏర్పాటుకు కమిటీ

AP Cabinet Approves New Districts Formation Committee: ఆంధ్రప్రదేశ్‌ క్యాబినెట్ సమావేశం ముగిసింది. వెలగపూడిలోని సచివాలయంలో ముఖ్యమంత్రి వైఎస్‌ జగన్‌మోహన్‌రెడ్డి అధ్యక్షతన జరిగిన ఈ సమావేశంలో పలు కీలక నిర్ణయాలు తీసుకున్నారు. ముఖ్యంగా రాష్ట్రంలో కొత్త జిల్లాల ఏర్పాటుకు అధ్యయన కమిటీని నియమించాలని.. ఈ మేరకు కమిటీ ఏర్పాటుపై మంత్రి మండలి ఆమోదం తెలిపింది. ఈ కమిటీకి ప్రభుత్వ ప్రధాన కార్యదర్శి నేతృత్వం వహిస్తారు. ఈ అధ్యయన కమిటీ.. వచ్చే ఏడాది మార్చి 31వ తేదీలోగా జిల్లాల ఏర్పాటు ప్రక్రియ పూర్తి చేయాలని కేబినెట్‌ నిర్ణయించింది. ఈ కమిటీ ప్రతి పార్లమెంట్‌ నియోజకవర్గం

కేంద్రంగా నూతన జిల్లాలను ఏర్పాటు చేస్తే ఎలా ఉంటుందనే దానిపై అలాగే కొత్త జిల్లాల సాధ్యాసాధ్యాలపై, అదనపు భారంపై ఈ కమిటీకి అధ్యయనం చేయనుంది. ప్రభుత్వ తాజా నిర్ణయంతో 13 జిల్లాలను పునర్వ్యవస్థీకరించి 25 జిల్లాలు ఏర్పాటు అయ్యే అవకాశం ఉంది. ఇక 26 వ జిల్లా ఏర్పాటుపై కూడా క్యాబినెట్ లో చర్చకు వచ్చింది. కొత్తగా ఏర్పాటు కానున్న అరకు జిల్లా భౌగోళికంగా 4 జిల్లాలలో అంతర్భాగం అయి ఉంది. ఈనేపథ్యంలో అరకును రెండు జిల్లాలు చేసేందుకు అధ్యయనం చేయాలని చీఫ్ సెక్రటరీకి ముఖ్యమంత్రి సూచించారు. కాగా ఎన్నికల్లో ఇచ్చిన హామీ మేరకు కొత్త జిల్లాల ఏర్పాటుకు సీఎం వైఎస్‌ జగన్‌ శ్రీకారం చుట్టిన సంగతి తెలిసిందే.