Annadata Sukhibhava: అర్హులైన రైతుల ఖాతాల్లో త్వరలోనే నిధుల జమ

Annadata Sukhibhava: రైతు ఆశించిన రోజులు వస్తున్నాయి. తన మట్టికీ, విత్తనానికీ, ఆకాశానికీ నమ్మకం పెట్టుకుని సాగు చేసే అన్నదాతకు ప్రభుత్వం నుండి బంగారు కాలం రాబోతుంది. ఆంధ్రప్రదేశ్ ప్రభుత్వం మళ్లీ ఒకసారి రైతుల మెడపై చేయి వేసింది. అన్నదాత సుఖీభవ పథకాన్ని తిరిగి ప్రారంభిస్తూ, నిధులు వారి ఖాతాల్లోకి జమ చేయడానికి అన్ని ఏర్పాట్లు చేసుకుంది. కేంద్ర ప్రభుత్వం విడుదల చేయబోయే పీఎం కిసాన్ నిధులతో పాటు రాష్ట్ర ప్రభుత్వం కూడా తనవంతు నిధులు కలిపి మొదటి విడతగా ఒక్కొక్కరికి ఏకంగా రూ.7,000 చొప్పున పంపిణీ చేయనుంది.

ఇప్పటికే అన్నదాత సుఖీభవ పథకానికి అర్హుల జాబితా సిద్ధమైంది. ప్రభుత్వం రూపొందించిన జాబితాలో మీ పేరు ఉందా లేదా అన్నదాన్ని తెలుసుకోవడం చాలా సులభం. అధికారిక వెబ్‌సైట్ ద్వారా ఆధార్ నంబర్ ఎంటర్ చేస్తే మీ పేరు, గ్రామం, జిల్లా వంటి వివరాలు వెంటనే కనిపిస్తాయి. ఈ ప్రక్రియ పూర్తిగా పారదర్శకంగా ఉండేలా తీర్చిదిద్దారు.

ఈ పథకాన్ని గతంలో అమలు చేయలేని ప్రభుత్వం తరువాత వచ్చిన నూతన కూటమి ప్రభుత్వం బడ్జెట్‌లో ప్రత్యేక నిధులు కేటాయించి మరలా అమలు చేయాలని నిర్ణయం తీసుకుంది. ఈసారి రైతులను ఎంపిక చేయడంలో ఎంతో జాగ్రత్తగా వ్యవహరించారు. మార్గదర్శకాలు, అధికారుల బాధ్యతలు ముందుగానే ఖరారు చేశారు. ఇక ఒక్క మాటలో చెప్పాలంటే, వ్యవసాయం చేసిన రైతన్నకి తిరిగి జీవం పోసేలా చర్యలు తీసుకున్నారు.

ప్రభుత్వ లెక్కల ప్రకారం, ఇప్పటి వరకు రాష్ట్రవ్యాప్తంగా 47 లక్షల మందికి పైగా రైతులను ఈ పథకానికి అర్హులుగా గుర్తించారు. వీరిలో చాలా మంది ఇప్పటికే ఈ-కేవైసీ ప్రక్రియను పూర్తిచేశారు. అయితే ఇంకా ఈ ప్రక్రియ పూర్తికాని రైతులు వెంటనే పూర్తి చేయాలని అధికారులు సూచిస్తున్నారు. ఎందుకంటే ఖాతాలోకి నిధులు జమ అయ్యేందుకు ఇది కీలకం.

ఆంధ్రప్రదేశ్ ప్రభుత్వం వ్యవసాయాన్ని ఓ బలమైన ఆర్థిక వ్యవస్థగా తీర్చిదిద్దేందుకు, రైతును వృద్ధి మార్గంలో నడిపించేందుకు కృషి చేస్తోంది. ఈ పథకం ద్వారా రైతు కేవలం పంట పండించడమే కాదు – తన కుటుంబానికి ఆర్థిక భద్రతను కూడా అందించగలుగుతాడు. పీఎం కిసాన్ పథకంతో కలిపి అన్నదాత సుఖీభవ ద్వారా ఏపీ రైతులు ఏడాదికి రూ.20 వేలు పొందనున్నారు. ఈ మొత్తాన్ని మూడు విడతలుగా అందించనున్నారు. మొదటి విడతగా జులైలో రూ.7 వేలు, నవంబరులో మరో రూ.7 వేలు, చివరిగా ఫిబ్రవరిలో రూ.6 వేలు రైతుల ఖాతాల్లోకి జమ చేయనున్నారు.

ఈ పథకానికి అర్హత పొందాలంటే రైతులు తమ భూముల వివరాలను వెబ్‌ల్యాండ్ సిస్టంలో జూన్ 30లోపు నమోదు చేసుండాలి. అలాగే పీఎం కిసాన్‌కు అర్హులైన రైతులు ఈ పథకానికి కూడా నేరుగా అర్హులవుతారు. ఎలాంటి అనుమానాలైనా, సమస్యలైనా ఉంటే రైతులు వారి ప్రాంతీయ రైతు సేవా కేంద్రాల్లో ఫిర్యాదు చేయవచ్చు. జూలై 10 వరకు ఫిర్యాదులను స్వీకరించనున్నారు. అవసరమైతే, వ్యవసాయ అధికారిని కలవచ్చు లేదా 155251 నంబర్‌కు కాల్ చేసి వివరాలు తెలుసుకోవచ్చు.

రైతులు తమ పేరు జాబితాలో ఉందా అని తప్పకుండా చెక్ చేసుకోవాలి. నిధులు ఖాతాలోకి జమ అవ్వడానికి అవసరమైన ప్రతి మెట్టును సకాలంలో పూర్తి చేయాలి. ఇదే వారికి మంచి ఫలితాలు ఇవ్వగలదు. ఇది కేవలం ఆర్థిక సాయం మాత్రమే కాదు, రైతు గుండెల్లో భరోసా నాటే ప్రయత్నం కూడా.