దేశవ్యాప్తంగా రైతులకు కేంద్ర ప్రభుత్వం కీలక ప్రకటన చేసింది. 2026 27 రబీ సీజన్‌లో ఫాస్ఫేటిక్, పొటాషిక్ (P&K) ఎరువులపై సబ్సిడీ కొనసాగించేందుకు కేంద్ర మంత్రివర్గం ఆమోదం తెలిపింది. అంతర్జాతీయ మార్కెట్‌లో ఎరువుల ధరలు, ముడి సరుకుల ధరల్లో చోటుచేసుకుంటున్న మార్పులను పరిగణనలోకి తీసుకుని సబ్సిడీ బడ్జెట్‌ను పెంచింది.

హిందూ సంప్రదాయంలో నాగ దేవతల ఆరాధనకు ఎంతో విశిష్టమైన స్థానం ఉంది. ముఖ్యంగా కార్తీక మాసంలో వచ్చే నాగుల చవితి పండుగను తెలుగు రాష్ట్రాలతో పాటు దక్షిణ భారతదేశంలోని పలు ప్రాంతాల్లో భక్తిశ్రద్ధలతో జరుపుకుంటారు. ఈ రోజున మహిళలు తమ పిల్లల ఆయురారోగ్యాలు, సుఖసంతోషాలు, దీర్ఘాయుష్షు కోసం నాగ దేవతలను పూజిస్తారు.

కార్తీక మాసంలో పరమశివుడి దర్శనం చేసుకోవాలనుకునే భక్తులకు ఇండియన్ రైల్వే క్యాటరింగ్ అండ్ టూరిజం కార్పొరేషన్ (IRCTC) శుభవార్త అందించింది. దేశంలోని ఏడు ప్రసిద్ధ జ్యోతిర్లింగాలను ఒకే యాత్రలో దర్శించుకునేలా ప్రత్యేక టూర్ ప్యాకేజీని ప్రకటించింది. 'సప్త జ్యోతిర్లింగ దర్శన యాత్ర' పేరుతో భారత్ గౌరవ్ టూరిస్ట్ ట్రైన్ ద్వారా ఈ పర్యటనను నిర్వహించనుంది.

దేశ రాజధాని ఢిల్లీతో పాటు నేషనల్ క్యాపిటల్ రీజియన్ (ఎన్‌సీఆర్) ప్రాంత ప్రజలకు పాల ధరల పెంపు షాక్ తగిలింది. ప్రముఖ పాల ఉత్పత్తుల సంస్థ మదర్ డెయిరీ పాల ధరలను పెంచింది. లీటరు పాలపై రూ.2 నుంచి రూ.4 వరకు ధరలు పెంచినట్లు పీటీఐ కథనం వెల్లడించింది. పెరిగిన ధరలు నవంబర్ 12, గురువారం నుంచి అమల్లోకి రానున్నాయి.

బంగాళాఖాతంలో మరో అల్పపీడనం ఏర్పడే సూచనలు కనిపిస్తున్నాయి. దక్షిణ అండమాన్ సముద్రం, పరిసర ప్రాంతాల్లో ఏర్పడిన ఉపరితల ఆవర్తనం ప్రభావంతో నవంబర్ 13 నాటికి ఆగ్నేయ బంగాళాఖాతంలో అల్పపీడనం ఏర్పడే అవకాశం ఉందని వాతావరణ శాఖ అంచనా వేస్తోంది.

సిరిసిల్లలో మై భారత్ ఆధ్వర్యంలో ‘వికసిత్ భారత్ యూత్ పార్లమెంట్’ నిర్వహించారు. ‘డ్రగ్ ఫ్రీ ఇండియా’పై వక్తృత్వ పోటీల్లో దీప్తి రాయ్, రామిజ్ రాజా, అవినాష్ రెడ్డి తొలి మూడు స్థానాలు సాధించి రాష్ట్రస్థాయికి ఎంపికయ్యారు. ఇక్కడ గెలిచిన వారికి ఢిల్లీలో జాతీయస్థాయి పోటీల్లో పాల్గొనే అవకాశం లభిస్తుందని అధికారులు తెలిపారు.

చెంగిచెర్ల క్రాంతి కాలనీలో యాదవ సంఘం ఆధ్వర్యంలో శ్రీకృష్ణ సదర్ సమ్మేళనం ఘనంగా జరిగింది. ముఖ్య అతిథిగా పాల్గొన్న బోడుప్పల్ మాజీ మేయర్ తోటకూర అజయ్ యాదవ్ మాట్లాడుతూ సదర్ యాదవుల సంస్కృతి, ఆచారాలకు ప్రతీక అని, ఐక్యతతో సామాజిక ప్రగతి సాధించాలని కోరారు. మాజీ కార్పొరేటర్లు, నాయకులు పెద్ద సంఖ్యలో పాల్గొన్నారు.

కొత్తకోట శ్రీ హరిహరపుత్ర అయ్యప్ప క్షేత్రంలో మకర సంక్రాంతి వరకు కొనసాగే నిత్య అన్నప్రసాద వితరణను జోషి గోపాలకృష్ణ గురుస్వామి ప్రారంభించారు. గత 13 ఏళ్లుగా ఈ కార్యక్రమం నిర్వహిస్తున్నామని, నిత్యం 500 మంది స్థానిక భక్తులు, శబరిమల యాత్రికులు అన్నప్రసాదం స్వీకరిస్తారని తెలిపారు. తొలిరోజు 120 మంది దీక్ష తీసుకున్నారు.

భద్రాద్రి కొత్తగూడెం జిల్లా బూర్గంపాడులో ఎమ్మెల్యే పాయం వెంకటేశ్వర్లు ఆధ్వర్యంలో జరిగిన సమీక్ష సమావేశానికి ఎక్సైజ్, ఆర్టీఏ, ఆర్ అండ్ బీ సహా నాలుగు శాఖల అధికారులు గైర్హాజరయ్యారు. ప్రజా సమస్యలపై అధికారులు ఇంత నిర్లక్ష్యంగా వ్యవహరించడంపై విమర్శలు వెల్లువెత్తాయి. వారిపై చర్యలు తీసుకోవాలని ప్రజలు కోరుతున్నారు.

జాన్‌పహాడ్‌లో జవహర్‌లాల్ లిఫ్ట్ ఇరిగేషన్ పనులను మంత్రి ఉత్తమ్ కుమార్ రెడ్డి, ఎంపీ రఘువీర్ రెడ్డి పరిశీలించారు. ఈ ప్రాజెక్టు ద్వారా 15 వేల ఎకరాలకు నీరందుతుందని, డిసెంబర్ నాటికి పనులు పూర్తి చేయాలని ఆదేశించారు. మళ్లీ వస్తే ప్రారంభోత్సవానికే వస్తానని అధికారులకు స్పష్టం చేశారు.

సంగారెడ్డి తారా కళాశాలలో ఎన్ఎస్ఎస్ ఆధ్వర్యంలో జాతీయ విద్యా దినోత్సవాన్ని పురస్కరించుకుని మౌలానా అబుల్ కలాం ఆజాద్ జయంతి వేడుకలు ఘనంగా జరిగాయి. ప్రిన్సిపల్ ప్రొఫెసర్ ప్రవీణ ఆయన చిత్రపటానికి నివాళులర్పించారు. యూజీసీ ఏర్పాటుకు, ఉన్నత విద్య విస్తరణకు ఆజాద్ వేసిన పునాదులను ఈ సందర్భంగా కొనియాడారు.

తెలంగాణలోని 6 లక్షల మంది గిగ్ వర్కర్ల హక్కుల పరిరక్షణకు ప్రత్యేక చట్టం, మొబైల్ యాప్ తెచ్చామని కార్మిక శాఖ మంత్రి వివేక్ వెంకటస్వామి తెలిపారు. ఈ నెల 14న హైదరాబాద్‌లో జరిగే భారత్ సమ్మిట్ సందర్భంగా శిల్పకళా వేదిక నుంచి హెచ్‌ఐసీసీ వరకు రాహుల్ గాంధీతో కలిసి గిగ్ వర్కర్ల భారీ ర్యాలీ ఉంటుందన్నారు.