కివీస్ తో వన్డే సిరీస్ లో టీమిండియా బోణీ

న్యూజిలాండ్ తో పాంచ్ పటాకా సిరీస్ లోని తొలివన్డేలో టీమిండియా అలవోక విజయం సాధించింది. నేపియర్ మెక్లీన్ పార్క్ వేదికగా ముగిసిన తొలిసమరంలో విరాట్ సేన 8 వికెట్ల విజయంతో 1-0 ఆధిక్యం సాధించింది. ఈ మ్యాచ్ లో టాస్ నెగ్గి ముందుగా బ్యాటింగ్ ఎంచుకొన్న ఆతిథ్య న్యూజిలాండ్ 38 ఓవర్లలో 157 పరుగులకే కుప్పకూలింది. కెప్టెన్ కేన్ విలియమ్స్ సన్ 64 పరుగులతో టాప్ స్కోరర్ గా నిలిచాడు. టీమిండియా బౌలర్లలో చైనామన్ స్పిన్నర్ కుల్దీప్ యాదవ్ 4 వికెట్లు, షమీ 3, చాహల్ 2 వికెట్లు, కేదార్ జాదవ్ ఒక వికెట్ పడగొట్టారు. సమాధానంగా 158 పరుగుల టార్గెట్ తో చేజింగ్ కు దిగిన టీమిండియాకు...ఓపెనర్లు రోహిత్- శిఖర్ ధావన్ మొదటి వికెట్ కు 41 పరుగులతో చక్కటి ఆరంభాన్ని ఇచ్చారు. ఓపెనర్ ధావన్, కెప్టెన్ కొహ్లీ...రెండో వికెట్ కు కీలక భాగస్వామ్యంతో టీమిండియాకు విజయం ఖాయం చేశారు. ధావన్ 69 బాల్స్ లో 6 బౌండ్రీలతో హాఫ్ సెంచరీ సాధించడం విశేషం. అంతకుముందు టీమిండియా ఫాస్ట్ బౌలర్ మహ్మద్ షమీ.. 100 వికెట్ల మైలురాయిని చేరాడు. వన్డే క్రికెట్లో అత్యంత వేగంగా వికెట్ల సెంచరీ సాధించిన భారత ఫాస్ట్ బౌలర్ గా షమీ రికార్డుల్లో చేరాడు.