అమెరికాలోని ఓ రెస్టారెంట్ లో తెలంగాణ విద్యార్థిని శరత్‌‌ను పొట్టన పెట్టుకున్న నిందితుడిని ఎట్టకేలకు అమెరికా పోలీసులు కాల్చి చంపేశారు. కేన్సస్‌లో కాల్పులకు తెగబడ్డ నిందితుడిని పట్టుకునేందుకు అమెరికా పోలీసులు ప్రయత్నించగా వారిపై కూడా కాల్పులు జరిపాడు. ఈ ఎదురు కాల్పుల్లో నిందితుడు మృతి చెందగా ముగ్గురు పోలీసులకు గాయాలయ్యాయి. అయితే వారి పరిస్థితి ప్రమాదకరంగా లేదని వైద్యులు ప్రకటించారు. నిందితుడికి సంబంధించి సీసీ కెమెరా దృశ్యాలను విడుదల చేసిన పోలీసులు అతడి కోసం జల్లెడపట్టారు. ఈ క్రమంలో దుండగుడి ఇంటిని పోలీసులు చుట్టుముట్టారు. దాంతో అతడు పోలీసులపై కాల్పులకు తెగబడ్డాడు. పోలీసులు ఎదురుకాల్పులు జరపడంతో దుండుగుడు అక్కడికక్కడే మృతి చెందాడు. అయితే దుండగుడి వివరాలను పోలీసులు ఇంకా బయటపెట్టలేదు.