Makhana Farming : తక్కువ పెట్టుబడి.. లక్షల్లో లాభం.. రైతులను లక్షాధికారులుగా మారుస్తున్న పంట

Agriculture : సాంప్రదాయ పంటలతో పోలిస్తే తక్కువ శ్రమ, తక్కువ పెట్టుబడితో అధిక ఆదాయం ఇచ్చే పంటల వైపు నేడు రైతుల చూపు మళ్లుతోంది. ఈ క్రమంలో సూపర్ ఫుడ్‌గా పేరుగాంచిన మఖానా సాగు ఇప్పుడు తెలుగు రాష్ట్రాల్లో హాట్ టాపిక్‌గా మారింది. పర్యావరణానికి మేలు చేస్తూనే, రైతు ఆర్థిక స్థితిగతులను మార్చగలిగే ఈ పంట విశేషాలు ఇవే..

పెట్టుబడి తక్కువ.. లాభం మెండు

మఖానా సాగులో ప్రధాన ఆకర్షణ దాని లాభదాయకత. గణాంకాల ప్రకారం.. ఒక ఎకరా మఖానా సాగుకు సగటున రూ. 60 వేల నుంచి రూ. 80 వేల వరకు ఖర్చు అవుతుంది. ఎకరాకు సుమారు 30 నుంచి 34 క్వింటాళ్ల వరకు దిగుబడి సాధించే అవకాశం ఉంది. సాగు ఖర్చులు పోను, ఒక రైతు ఎకరాకు రూ. 2 లక్షల నుంచి రూ. 2.5 లక్షల వరకు లాభం పొందవచ్చు.

చీడపీడల బెడద లేని పంట

ఈ పంట సాగులో రసాయన ఎరువుల వాడకం చాలా తక్కువ.రసాయన మందుల కంటే వేపనూనె పిచికారీ చేయడం ద్వారానే చీడపీడలను సమర్థవంతంగా అరికట్టవచ్చు. ఇతర వాణిజ్య పంటలతో పోలిస్తే దీనికి తెగుళ్ల భయం తక్కువ, తద్వారా నిర్వహణ ఖర్చు కూడా తగ్గుతుంది. సుమారు 8 నెలల సాగు కాలంలో ఈ పంట చేతికి వస్తుంది.

ప్రపంచ మార్కెట్‌లో సూపర్ ఫుడ్‌గా క్రేజ్

మఖానాలో పోషక విలువలు పుష్కలంగా ఉండటంతో దీనికి అంతర్జాతీయ మార్కెట్‌లో విపరీతమైన డిమాండ్ ఉంది. ఆరోగ్య స్పృహ పెరిగిన నేటి కాలంలో చిరుతిండిగా, ఔషధంగా మఖానాను ప్రపంచవ్యాప్తంగా గుర్తిస్తున్నారు. మార్కెట్ ధరలు కూడా రైతుకు అనుకూలంగా ఉండటంతో, పండించిన పంటను అమ్ముకోవడం సులభతరం అవుతోంది.

మఖానాకు అనుకూలం

ఇప్పటివరకు బీహార్ వంటి రాష్ట్రాలకే పరిమితమైన ఈ సాగును ఇప్పుడు మన తెలుగు నేలలపై కూడా విజయవంతంగా పండించవచ్చని వ్యవసాయ నిపుణుల అధ్యయనాల్లో తేలింది. ముఖ్యంగా నీటి వసతి ఉన్న ప్రాంతాల్లో, సంప్రదాయ పంటలకు ప్రత్యామ్నాయంగా మఖానాను సాగు చేయడం ద్వారా రైతులు తమ ఆదాయాన్ని రెట్టింపు చేసుకోవచ్చు. నిరంతరం ఒకే రకమైన పంటలు వేసి నష్టపోయే కంటే, మఖానా వంటి వినూత్న మరియు లాభసాటి పంటల వైపు అడుగులు వేయడం ఉత్తమం. పర్యావరణానికి మేలు చేస్తూ, ఆరోగ్యకరమైన ఆహారాన్ని అందిస్తూనే లక్షల్లో లాభాలు ఆర్జించే అవకాశం మఖానా సాగు ద్వారా లభిస్తోంది.