తెలంగాణ పోలీసులు నిజమైన హీరోలు.. దిశ ఘటనపై నయనతార

దిశ కేసులో నిందితుల అయిన నలుగురిని ఎన్‌కౌంటర్‌చేయడంపై ప్రతి ఒక్కరు హర్షం వ్యక్తం చేస్తున్నారు. ఇందులో కీలక పాత్ర పోషించిన తెలంగాణా పోలీసులకి ధన్యవాదాలు తెలుపుతున్నారు. ఈ సంఘటనపై సినీ తారలు తమదైన స్టైల్‌లో స్పందిస్తున్నారు. దిశకు సరైన న్యాయం జరిగిందంటూ తమ అభిప్రాయాలను సోషల్‌ మీడియా ద్వారా వ్యక్తం చేస్తున్నారు. తాజాగా ఈ సంఘటనపై లేడీ సూపర్‌ స్టార్‌ నయనతార స్పందించింది. ఈ ఘటనపై నయనతార ఓ ప్రకటన విడుదల చేసింది..

ఆ ప్రకటనలో నయనతార "అన్యాయం జరిగిన వెంటనే న్యాయం జరిగితేనే అది సరైంది. తెలంగాణ పోలీసులు నిజమైన హీరోలని ఈ రోజు తమ చర్యతో దాన్ని ప్రూవ్‌ చేశారు. దేశంలోని ప్రతీ మహిళ ఈ రోజును క్యాలెండర్‌లో నిజమైన న్యాయం జరిగిన రోజుగా గుర్తుంచుకోవాలి. మానవత్వం అంటే అందరిపై సమానంగా గౌరవించటం, ప్రేమించటం, దయ చూపించటం. ఇప్పుడు జరిగిన ఈ న్యాయానికి సంతోషపడటం కన్నా.. మన పిల్లల్ని సరైన మార్గంలో నడిపించేందుకు ప్రయత్నించాలి. ముఖ్యంగా మన ఇళ్లలోని మగ పిల్లల్ని.. ఈ ప్రపంచం మహిళలకు సురక్షితంగా మార్చిన వాడే అసలైన మగాడు అన్న విషయం తెలియజేయాలి`అంటూ ఆ ప్రకటనలో పేర్కొంది నయనతార..

ఇక నయనతార సినిమాల విషయానికి వస్తే చిరంజీవి నటించిన సైరా, విజయ్ నటించిన విజిల్ సినిమాలతో తాజాగా ప్రేక్షకుల ముందుకు వచ్చింది ఈ భామ. ప్రస్తుతం రజినీకాంత్ హీరోగా నటిస్తున్న దర్బార్ చిత్రంలో నటిస్తుంది. ఈ సినిమాకి ఏ ఆర్ మురగదాస్ దర్శకత్వం వహించారు. సంక్రాంతికి కానుకగా సినిమాని విడుదల చేయనున్నారు.