కరీంనగర్ కార్పోరేషన్ ఓట్ల లెక్కింపు ప్రక్రియ ప్రారంభం

తెలంగాణ రాష్ట్రంలోని కరీంనగర్ జిల్లాలో అన్ని మున్సిపాలిటీల్లో ఎన్నికలు జరిగిన 2 రోజుల తరువాత ఎన్నికలు నిర్వహించిన సంగతి తెలిసిందే. ఇక పోతే ఎంతో ఉత్కంఠగా సాగిన మున్సిపల్ కార్పోరేషన్ ఎన్నికల ఓట్ల లెక్కింపుని ఇవాళ ఉదయం 7 గంటలకు ఈసీ చేపట్టారు. పట్టణంలోని ఎస్ ఆర్ ప్రభుత్వ డిగ్రీ కళాశాలలో ఈ ఓట్ల లెక్కింపు ప్రకియ నిర్వహిస్తున్నారు. కాగా కరీంనగర్ కార్పోరేషన్లో మొత్తం 60 డివిజన్లు ఉండగా వాటిలో 20, 37 డివిజన్లలో టీఆర్ఎస్ అభ్యర్థులు తుల రాజేశ్వరి, చల్లా స్వరూపారాణి బరిలో దిగగా ఈ రెండు డివిజన్లు ఇప్పటికే ఏకగ్రీవంగా ఎన్నికయ్యాయి. ఇక పోతే మిగిలిన 58 డివిజన్లలో అభ్యర్థులకు పోలైన మొత్తం ఓట్లను లెక్కించి గెలుపు ఎవరిని వరించిందో తెలుపుతారు.

కౌంటింగ్ ప్రక్రియకు మొత్తం 58 టేబుళ్లు ఏర్పాటు చేశారు. ఇందులో మొత్తం ౩ రౌండ్లలో ఓట్ల లెక్కింపు నిర్వహిస్తారు. ఈ ప్రక్రియకు 58 మంది సూపర్వైజర్లు, ఇద్దరు చొప్పున అసిస్టెంట్లను ఈసీ నియమించింది. ఇందులో భాగంగానే 20 మంది మైక్రో అబ్జర్వర్లను నియమించారు. ఇక ఈ ఓట్ల లెక్కింపు ప్రక్రియలో ఎలాంటి అవాంఛనీయ సంఘటనలు జరగకుండా అధికారులు భారీ భద్రతా ఏర్పాట్లను చేసారు. ఇందులో భాగంగానే కౌటింగ్ కేంద్రం వద్ద సీసీ కెమెరాలు ఏర్పాటు చేశారు.