లీటర్ల కొద్ది పాలు ఇస్తున్న లేగదూడ.. ఎలా సాధ్యమో తెలుసా?

అప్పుడే పుట్టిన లేగదూడ పాల కోసం తపిస్తుండటం చూసి ఉంటాం. కానీ ఓ లేగదూడ మాత్రం వింతగా లీటర్ల కొద్ది పాలు ఇస్తూ అందరిని ఆశ్చర్యపరుస్తోంది. అది పుట్టి కేవలం 5 రోజులు కూడా కాలేదు.. అప్పుడే ఆవులా పాలు ఇవ్వడం చూసి జనం ఇదేం వింత అని చర్చించుకుంటున్నారు. నిర్మల్ జిల్లా దిలావర్‌పూర్ మండలం కొత్తలోలం గ్రామంలో ఇది చోటు చేసుకుంది. దీంతో ఈ దూడను చూసేందుకు జనం పెద్ద ఎత్తున తరలివస్తున్నారు.

మహ్మద్‌ అజారుద్దీన్‌ అనే పాడిరైతుకు కొన్ని ఆవులు ఉన్నాయి. వాటి పాల ద్వారా అతడు జీవనోపాధి పొందుతున్నాడు. అతనికి చెందిన డైరీఫామ్‌లో ఓ జెర్సీ ఆవు ఐదురోజుల క్రితం లేగదూడకు జన్మనిచ్చింది. అయితే శుక్రవారం దాని పొదుగు పెద్దది కావడాన్ని ఆ రైతు గమనించాడు. ఏం జరుగుతుందని అతనికి అర్థం కాలేదు. చిన్న లేగదూడ పాలు ఇవ్వడం ఏంటని వెంటనే పశువైద్యులను సంప్రదించాడు. వారు పరీక్షించి అది హర్మోన్ల ప్రభావంగా గుర్తించారు. ఇలాంటి ఘటనలు చాలా అరుదుగా చోటు చేసుకుంటాయని చెప్పారు.