రాజకీయాల్లోకి రావడంపై స్పందించిన గంభీర్

టీమిండియా మాజీ క్రికెటర్ గౌతం గంభీర్ త్వరలో రాజకీయాల్లోకి రానున్నట్టు కొంతకాలంగా సామాజిక మాధ్యమాల్లో వార్తలు హల్చల్ చేస్తున్న సంగతి తెలిసిందే.. అయితే ఈ వార్తలను గౌతమ్ గంభీర్ ఖండించకపోవడంతో ఆయన రాజకీయాల్లోకి రావడం ఖాయమని అందరూ భావించారు. అయితే ఇవాళ ఆ వార్తలకు పులుస్టాప్ పడింది. రాజకీయాల్లోకి వస్తున్నట్టు జరుగుతున్న ప్రచారంపై స్పందించాడు గంభీర్.

తాను రాజకీయాల్లోకి రాబోవడం లేదని స్పష్టం చేశాడు. ఆ ఊహాజనిత వార్తల్లో వాస్తవం లేదని కొట్టి పడేశాడు. ప్రస్తుతానికి తాను రిటైర్డ్ క్రికెటర్‌ను మాత్రమేనని పేర్కొన్నాడు. ఆస్ట్రేలియాలో పర్యటిస్తున్న భారత జట్టు సిరీస్ గెలుపు కోసం అందరిలా తాను కూడా వేచి చూస్తున్నట్టు చెప్పాడు. కాగా ఇటీవలే క్రికెట్‌కు రిటైర్మెంట్ ప్రకటించిన ఈ స్టార్ ఆటగాడు.. బీజేపీలో చేరబోతున్నాడంటూ వార్తలు హల్‌చల్ చేశాయి. త్వరలో జరగనున్న సార్వత్రిక ఎన్నికల్లో ఎంపీ లేదా ఎమ్మెల్యేగా గంభీర్ పోటీ చేయబోతున్నాడంటూ పుకార్లు షికారు చేశాయి. కానీ ఈ తాజా ట్వీట్‌తో ఈ పుకార్లకు ఫుల్‌స్టాప్ పడినట్లయింది.