Mamata Benarjee: దీదీ రాజకీయ ప్రస్థానం

బెంగాల్‌ సీఎంగా తృణమూల్‌ అధినేత్రి మమతా బెనర్జీ వరుసగా 3వసారి ఎన్నికయ్యారు. దీదీ నిరాడంబరత, ప్రజాదరణ ముందు ప్రతిపక్షాల వ్యూహాలు నిలవలేకపోయాయి. నందిగ్రామ్‌లో ఓడినా.. తృణమూల్‌ కాంగ్రెస్‌ 213 సీట్లతో అధికారం చేపట్టింది. బెంగాల్‌లో హ్యాట్రిక్‌ సీఎంగా దీదీ బుధవారం ప్రమాణస్వీకారం చేశారు.
మమత తండ్రి స్వాతంత్య్ర సమరయోధుడు. తండ్రి చనిపోయేనాటికి మమతకు 17 ఏళ్లు. తమ్ముడు చాయ్‌ అమ్ముతూ కుటుంబాన్ని పోషించేవాడు.
మమత ఉదయం పాలను అమ్ముతూ.. కాలేజీలో చదువుకుంటూనే బడిలో పాఠాలు చెప్పేవారు. 15 ఏళ్ల వయస్సు నుంచే దీదీ కాంగ్రెస్‌ విద్యార్థి రాజకీయాల్లో పాల్గొనేవారు.
1984లో లోక్‌సభ ఎన్నికల్లో ఇందిర హత్యానంతరం సానుభూతి పవనాల్లో సీపీఎం దిగ్గజం సోమనాథ్‌ ఛటర్జీని మమత ఓడించి తొలిసారి ఎంపీగా ఎన్నికయ్యారు. అప్పుడామె వయస్సు కేవలం 29 ఏళ్లు మాత్రమే.
కుటుంబ వారసత్వం లేకుండా అంత చిన్న వయస్సులో ఎంపీగా ఎన్నికై.. రికార్డు నెలకొల్పారు.
మమత 1989 ఎన్నికల్లో ఓడిపోయారు. 1991లో తిరిగి ఎంపీగా గెలిచారు. అప్పటి నుంచి 2011లో సీఎం అయ్యే వరకు వరుసగా ఆరుసార్లు కోల్‌కతా దక్షిణ నియోజకవర్గం నుంచి విజయ ఢంకా మోగిస్తూనే ఉన్నారు దీదీ.
1997లో సొంత పార్టీ తృణమూల్‌ కాంగ్రెస్‌ను ఏర్పాటు చేసి ఔరా అనిపించారు.
మమత జీవితం అత్యంత నిరాడంబరంగా ఉంటుంది. రాజకీయంగా ఎంత ఎత్తుకు ఎదిగినా కోల్‌కతాలోని మధ్యతరగతి వీధిలోనే ఆమె నివాసం ఉంటుంది.
సాధారణమైన కాటన్‌ చీరలే కడతారు. కాళ్లకు రబ్బరు చెప్పులు వేసుకుంటారు. మేకప్‌ వాడరు. ఆభరణాలు ధరించరు. అవివాహితురాలు. చేతికి ఉండే గుడ్డ సంచి మాత్రమే ఆమె లగేజీ, బ్యాగేజీ.
2004-09 మధ్య కాలం మమతకు అత్యంత క్లిష్ట సమయాన్ని చవిచూసింది. ఆ తరువాత 2011 అసెంబ్లీ ఎన్నికల్లో కాంగ్రెస్‌తో కలిసి ఘన విజయం అందుకున్నారు.
2011 తర్వాత బెంగాల్‌లో తృణమూల్‌ పాతుకుపోయింది. మిత్రపక్షాల అవసరమే లేకుండా సొంత కాళ్లపైనే నిలబడి అపూర్వ విజయాలను అందుకుంటోంది.
2009 లోక్‌సభ ఎన్నికల్లో వామపక్షాలను చిత్తుగా ఓడించిన దీదీ.. 2011లో జరిగిన అసెంబ్లీ ఎన్నికల్లోనూ మార్క్సిస్టులకు అధికారం దూరం చేశారు.
గత ఎన్నికల్లో ‘మా-మాటీ- మానుష్‌’ నినాదంతో బెంగాల్‌ ప్రజలకు దీదీ మానసికంగా దగ్గరైంది. ఈ ఎన్నికల్లో ‘లోకల్‌’ నినాదంతో బీజేపీ దూకుడుకు చెక్‌ పెట్టింది.