ప్రైవేటు రైలు.. సౌకర్యాల జోరు!

రైలు ప్రయాణం అంటే.. ముఖ్యంగా దూరప్రయాణం అంటే ఎంతో బోరు. బస్సులో అయితే చక్కగా టీవీ.. సినిమాలు చూస్తూ కాలక్షేపం చేసే అవకాశం ఉంటుంది. కానీ, రైలులో ఆ అవకాశమే లేదు ఇన్నాళ్లూ. ఇపుడు రైలు ప్రయాణం కూడా ఆహ్లాదంగా మారబోతోంది. అందుకు తొలి అడుగు వేస్తున్నట్టు మొన్న బడ్జెట్ లో రైల్వే మంత్రి చెప్పారు. అయితే, ఈ రైలు పూర్తిగా ప్రయివేటు సంస్థ నడుపుతుంది. ఢిల్లీ - లక్నో మధ్య నడిచే తేజస్ ఎక్స్ ప్రెస్ రైలు ప్రైవేటు సంస్థల అధీనంలో పరుగులు తీయడానికి సిద్ధం అవుతోంది. ఈ రైలు ప్రత్యేకతలు ఇవిగో..

- పూర్తి ఏసీ రైలు ఇది. మొత్తం 23 కోచ్ లు ఉంటాయి.

- ప్రతి సీటు వెనుకా ఎల్సీడీ స్క్రీన్ ఉంటుంది. ఇందులో ఇష్టమైన సినిమాలను, టీవీ కార్యక్రమాలను చూసే వెసులుబాటూ ఉంటుంది.

- ప్రతి సీటుకూ వైఫై, మొబైల్ చార్జింగ్ పాయింట్లూ అందుబాటులో ఉంటాయి.

- రైలు రంగుకు మ్యాచ్ అయ్యేలా, పసుపు ఆరెంజ్ రంగుల్లో ఉండే సీట్లు చాలా సౌకర్యవంతంగా ఉంటాయట.

- ప్రతి కోచ్ కు చిన్న పాంట్రీ ఉంటుంది. ఎల్ఈడీ లైట్లు, మాడ్యులార్ టాయిలెట్ లు దీని ప్రత్యేకత.

- విండోస్ మోటార్ ఆపరేషన్ తో స్మార్ట్గా ఉంటాయి.

- కోచ్ లకు ఆటోమేటిక్ తలుపులు ఉంటాయి.

ఇన్ని ప్రత్యేకతలు ఉన్న ఈ రైలు ఇప్పటికే ఆనంద్ నగర్ స్టేషన్లో ఉంది. దీనిని ప్రయివేట్ లో నడపాలని తీసుకున్న నిర్ణయంతో ఇప్పుడు బిడ్డింగ్ నిర్వహించడానికి అధికారులు సిద్ధం అవుతున్నారు. బిడ్డింగ్ ద్వారా కాంట్రాక్టు దక్కించుకున్న సంస్థ ఈ రైలు నడుపుతుంది. రైల్వేలను ప్రైవేటీకరించాలన్న ఆలోచనలో కేంద్రం ఉందని, అందులో భాగంగానే ఈ పని చేస్తోందని విపక్షాలు విమర్శిస్తుంటే, ఆ శాఖ మంత్రి పీయుష్ గోయల్ సమాధానం ఇస్తూ, రైల్వేల ప్రైవేటీకరణ ప్రతిపాదనలు ఇంతవరకూ లేవని స్పష్టం చేశారు.