చచ్చింది మేకే కదా అనుకుంటే.. కంపెనీ సొమ్ము మూడుకోట్లు ఊడ్చేసింది!

మార్కెట్ లో ఓ మేకను కొంటె మహా అయితే ఆరు వేలు లేదా ఇంకా ఎక్కువ అనుకుంటే ఓ పదివేలకు కాస్త అటూ ఇటూగా ఉంటుంది. కానీ, ఓ మేక చనిపోయి.. తన యజమానులకు అరవైవేలు ఇప్పించింది. ఇది పెద్ద విశేషం కాదు అనుకుంటే.. ఆ మేక చావుతో ఒక బొగ్గు కంపెనీకి ఏకంగా మూడు కోట్ల నష్టం వచ్చింది. అవునా.. అని నోరు నొక్కుకోకండి.. ఈ కథనం చదివితే మీకు విషయం అర్థం అవుతుంది. ఏ జీవినీ తక్కువ లేక్కేయకూడదని తెలుసుకుంటారు.

ఈ సంఘటన ఒడిశా రాష్ట్రంలో చోటు చేసుకుంది. ఈ నెల ఒకటిన ఒడిశాలోని మహానంది కోల్ ఫీల్డ్ లిమిటెడ్ బొగ్గు నిక్షేపాలను వెలికితీస్తుంది... దానిని బొగ్గు గనుల నుంచి రైల్వే వ్యాగన్లకు బొగ్గును సరఫరా చేసేందుకు ఓ ట్రక్కును ఏర్పాటు చేసుకుంది. ఈ క్రమంలో ఆ ట్రక్కుని ఢీకొని ఓ మేక చనిపోయింది. ఉదయం 11 గంటల సమయంలో ఇది చోటు చేసుకుంది .

దీనితో ఆ మేక చనిపోయినందుకు గాను నష్ట పరిహారం చెల్లించాలని స్థానికులు డిమాండ్ చేసారు. అక్కడికి పోలీసులు కూడా వచ్చారు. అందరి మధ్య ఓ సఖ్యత కుదిరాక చనిపోయిన మేకకి గాను 60 వేలు నష్టపరిహారం చెల్లించారు. ఈ తతంగం అంతా ముగిసేసరికి మధ్యాహ్నం 2.30 అయింది. ఈ మూడున్నర గంటల పాటు బొగ్గు రవాణా నిలిచిపోవడం వల్ల కంపెనీకి రూ.1.4 కోట్లు నష్టం వచ్చింది. రవాణా ఆలస్యం కావడం వల్ల రైల్వేకి రూ.1.28 కోట్లు చెల్లించాల్సి వచ్చింది. దీంతోపాటు బొగ్గు ఉత్పత్తి నిలిచిపోవడం వల్ల రూ.46 లక్షల నష్టం వచ్చింది...