'ఆచార్య' లో మహేష్ ... క్లారిటీ ఇచ్చిన చిరు!

గత ఏడాది సైరా సినిమాతో ప్రేక్షకుల ముందుకు వచ్చిన మెగాస్టార్ చిరంజీవి ప్రస్తుతం కొరటాల శివ దర్శకత్వంలో 'ఆచార్య' అనే సినిమాని చేస్తున్నాడు ఇది చిరంజీవికి 152వ సినిమా.. ఈ సినిమాని మ్యాట్నీ ఎంటర్టైన్మెంట్, కొణిదెల ప్రొడక్షన్స్ కలిసి నిర్మిస్తున్నాయి. కాజల్ హీరోయిన్ గా నటిస్తోంది. పక్కా సోషల్ మెసేజ్ తో తెరకెక్కుతుంది. ఈ సినిమాలో రెజీనా ఒక ప్రత్యేక పాటలో కనిపించనుంది. మణిశర్మ సంగీతం అందిస్తున్న ఈ సినిమాని దసరా సందర్భంగా విడుదల చేయాలని చిత్ర బృందం భావిస్తోంది. ప్రస్తుతం కరోనా ప్రభావం వలన సినిమా వాయిదా పడింది..

అయితే ఈ సినిమాలో మహేష్ బాబు ఓ కీలక పాత్ర పోషిస్తున్నారని, వార్తలు వచ్చిన సంగతి తెలిసిందే.. దీనికోసం మహేష్ బాబు 30 రోజుల కాల్‌షీట్లు కూడా ఇచ్చేశారని అన్నారు. ఈ పాత్రకు గాను మహేష్ భారీ రెమ్యునరేషన్ తీసుకుంటున్నాడనే ప్రచారం జరిగింది. అయితే మళ్ళీ ఏమైందో కానీ ఈ సినిమాలో మహేష్ చేయడం లేదని, ముందుగా అనుకున్న రామ్ చరణ్ ఆ పాత్ర చేస్తున్నారని వార్తలు వచ్చాయి. కానీ దీనిపైన ఆచార్య టీం కానీ, అటు మహేష్ బాబు కానీ స్పందించింది లేదు..

కానీ తాజాగా ఓ ప్రముఖ ప‌త్రిక‌కి ఇంట‌ర్వ్యూ ఇచ్చిన చిరంజీవి దీనిపైన క్లారిటీ ఇచ్చారు. అసలు ఆచార్యలో మ‌హేష్ న‌టిస్తున్నాడ‌న్న వార్త ఎలా బ‌య‌ట‌కి వ‌చ్చిందో అర్ధం కావ‌డం లేదు అని అన్నారు. మ‌హేష్‌ని నేను చాలా గౌర‌విస్తాను. ఆయ‌న కూడా న‌న్ను అంతే ప్రేమిస్తారు. మ‌హేష్ నాకు కొడుకు లాంటి వాడు అని స్పష్టం చేశారు. మ‌హేష్ తో క‌లిసి సినిమా చేసే ఛాన్స్ వ‌స్తే త‌ప్పక చేస్తాన‌ని కూడా చిరు పేర్కొన్నారు. ఇక ఓ పాత్రకు ముందునుంచి రామ్ చరణ్ అయితే బాగుంటుందని దర్శకుడు కొరటాల అనుకుంటున్నాడని చెప్పుకొచ్చాడు.

ప్రస్తుతం చరణ్ ఓ రాజమౌళి తెరకెక్కిస్తున్న RRR అనే సినిమాలో నటిస్తున్నాడు. ఆ సినిమా పూర్తి కాకుండా చరణ్ మాకు ఎంత వరకు డేట్స్ ఇవ్వగలడు అనే అనుమానం ఉంది. ఒకవేళ రాజమౌళి, కొరటాల శివ ఒక అండర్‌స్టాండింగ్‌కు వస్తే 'ఆచార్య'లో చరణ్ ఉండొచ్చుని చిరు వెల్లడించాడు. చిరు తాజా వాఖ్యాలతో ఆచార్యలో మహేష్ అనే వార్తలకి చెక్ పెట్టినట్లు అయింది.