మరోసారి ఆ దర్శకుడితో బాలయ్య?

గత ఏడాది బాలకృష్ణ రెండు సినిమాలతో ఫ్యాన్స్ ని నిరాశపరిచాడు. ఎన్టీఆర్ కథానాయకుడు, మహానాయకుడు మరియు రూలర్ సినిమాలు విజయాన్ని అందుకోలేకపోయాయి. ఇప్పుడు బాలకృష్ణకి హిట్టు తప్పనిసరి అయిపొయింది. ప్రస్తుతం బాలయ్య బోయపాటి శ్రీను దర్శకత్వంలో ఓ సినిమా చేస్తున్నాడు. ఇప్పటికే ముహూర్తపు సన్నివేశాలను పూర్తి చేసుకున్న ఈ సినిమా ఈ నెలలో రెగ్యులర్ షూటింగ్ ప్రారంభం కానుంది.

గతంలో బోయపాటి బాలకృష్ణ. గతంలో వీరి కాంబినేషన్‌లో వచ్చిన సింహా, లెజెండ్‌ సినిమాలు మంచి విజయం సాధించటంతో ఈ సినిమాపైన భారీ అంచనాలు ఉన్నాయి. ఈ సినిమాని మిర్యాల రవీందర్ రెడ్డి నిమిస్తుండగా, తమన్ సంగీతం అందిస్తున్నాడు. క్యాథరిన్ హీరోయిన్ గా ఫిక్స్ అయింది. కానీ ఇంకా చిత్ర యూనిట్ అధికారికంగా ప్రకటించాల్సి ఉంది. ఈ సినిమాలో బాలయ్య రెండు విభిన్నమైన పాత్రలో కనిపించనున్నట్టు తెలుస్తోంది.

ఈ సినిమా తర్వాత బాలకృష్ణ తనకి గతంలో మంచి హిట్లు ఇచ్చిన సీనియర్ దర్శకుడు బి గోపాల్ తో ఓ సినిమాని చేసేందుకు ప్లాన్ చేస్తున్నాడని తెలుస్తుంది. గతంలో బాలకృష్ణ బి గోపాల్ కాంబినేషన్ లో లారీ డ్రైవర్ , రౌడీ ఇన్‌స్పెక్టర్, సమరసింహా రెడ్డి, నరసింహ నాయడు లాంటి సూపర్‌ హిట్ సినిమాలు వచ్చాయి. చివరగా వీళ్లిద్దరి కాంబినేషన్ లో 'పల్నాటి బ్రహ్మనాయుడు' చిత్రం తెరకెక్కింది. ఈ చిత్రం బాక్సాఫీస్ దగ్గర ఘోర పరాజయం పాలైంది. ఆ తర్వాత 'హర హర మహదేవ ' అనే సినిమాని మొదలుపెట్టినప్పటికీ సినిమా మధ్యలోనే ఆగిపోయింది.

ఇక ప్రస్తుతం బి గోపాల్ సినిమాలు అయితే చేయడం లేదు. చివరగా ఆయన గోపీచంద్ హీరోగా ఆరడుగుల బుల్లెట్టు సినిమాకి దర్శకత్వం వహించారు. కానీ సినిమా విడుదల కాలేదు. ఇప్పుడు ఈ సీనియర్‌ డైరెక్టర్‌ బాలయ్య హీరోగా సినిమా చేసేందుకు రెడీ అవుతున్నాడట. ఇప్పటికే ఇద్దరి మధ్య కథ చర్చలు కూడా జరిగాయని బాలయ్య కూడా దీనికి ఓకె చెప్పినట్టుగా ప్రచారం జరుగుతోంది.

ఇక ఈ సినిమానే కాకుండా ఎప్పటినుంచో బాలకృష్ణ డ్రీం ప్రాజెక్ట్ గా అనుకుంటున్న ఆదిత్య 369కి కూడా సీక్వెల్ కి ప్లాన్ చేస్తున్నట్టుగా తెలుస్తుంది. ఇప్పటికే దీనిపైన కథ చర్చలు కూడా ఎప్పుడో పూర్తి అయ్యాయని సెట్స్ వైపు వెళ్లేందుకు ప్రయత్నాలు జరుగుతునట్టుగా తెలుస్తుంది. ఈ సినిమా బాలకృష్ణ దర్శకత్వం వహించనున్నారని టాక్.. ఆదిత్య 369కి సింగీతం శ్రీనివాస్ రావు దర్శకత్వం వహించారు. అప్పట్లో ఈ సినిమా మంచి విజయాన్ని అందుకుంది.