‘రంగస్థలం’ టీజర్‌ వచ్చేసింది!

మెగా అభిమానులు ఎప్పుడెప్పుడా అని ఎదురు చూస్తున్న ‘రంగస్థలం’ టీజర్ వచ్చేసింది. చెప్పిన టైమ్‌కు కరెక్ట్‌గా టీజర్‌ను విడుదల చేసి అభిమానులను ఖుషీ చేసింది చిత్ర యూనిట్. ఈ టీజర్‌లో అందరు ఊహించినదానికంటే కూడా ఎక్కువ మాస్‌ గెటప్‌ రామ్‌ చరణ్‌ తేజ కనిపించారు. పక్కా పల్లెటూరి కుర్రాడిగా అదరగొట్టాడు. అదిరిపోయే డేస్‌ డ్రమ్స్‌ బ్యాక్‌గ్రౌండ్‌ మ్యూజిక్‌తో మొదలైన టీజర్‌లో తొలుత ఓ పాత బ్రిడ్జిపై లాంగ్‌ షాట్‌లో సైకిల్‌ తొక్కుతున్న రామ్‌చరణ్‌ కనిపించగా ఆ వెంటనే ఏపుగా పెరిగి ఎండిపోయిన రేలుగడ్డిలో దేన్నో వేటాడేందుకు పరిగెడుతున్నట్లుగా రామ్‌చరణ్‌ కనిపిస్తాడు.

ఆ వెంటనే ఓ ఆయిల్‌ ఇంజిన్‌ మోటర్‌ను స్టార్ట్‌ చేస్తూ 'నాపేరు చిట్టిబాబండి.. మా ఊరుకు నేనే ఇంజినీర్‌' అనే డైలాగ్‌తో టీజర్‌ మొదలవగా ఈ సినిమాలో రామ్‌చరణ్‌ బదిరుడా అని అనుమానం వచ్చేట్లుగా దర్శకుడు హింట్‌ ఇచ్చాడు. అందుకు తగినట్లుగా 'అందరికి సౌండ్‌ వినపడిద్దండి.. నాకు సౌండ్‌ కనపడుద్దండి' అనే డైలాగ్‌ కూడా రామ్‌ చరణ్‌ ఈ టీజర్‌లో చెప్పేశాడు. అనంతరం కత్తిపట్టుకొని ఆవేశంగా రామ్‌చరణ్‌ వస్తుండటాన్ని బట్టి మాస్‌ ప్రేక్షకులను ఈ సినిమా కట్టిపడేస్తుందేమో అని చెప్పకతప్పదేమో. మొత్తానికి టీజర్‌లో మాత్రం పాతకాలంనాటి ఓ పల్లెటూరును అందులోని ఓ మొరటు కుర్రాడిని అద్భుతంగా చూపించారనే చెప్పాలి. సుకుమార్‌ దర్శకత్వంలో రూపొందుతున్న ఈ చిత్రం మార్చి 30న ప్రేక్షకుల ముందుకు రాబోతోంది. మైత్రీ మూవీ మేకర్స్ బ్యానర్‌పై నవీన్ ఎర్నేని, రవి శంకర్, సీవీ మోహన్ నిర్మిస్తున్న ఈ సినిమాలో ఆది పినిశెట్టి, అనసూయ కీలకపాత్రలు పోషిస్తున్నారు.