నిర్లక్ష్యానికి పరాకాష్ట: RTC డ్రైవర్ కోతితో బస్సు నడిపించాడు

కొందరు బస్సు డ్రైవర్లు ప్రయాణికుల ప్రాణాలతో చెలగాటం ఆడుతున్నారు. ప్రయాణికులను క్షేమంగా గమ్య స్థానాలకు చేర్చాల్సిన బాధ్యతను విస్మరించి వారి ప్రాణాలకు ముప్పు తెచ్చేలా వ్యవహరిస్తున్నారు. ఓ బస్సు డ్రైవర్‌ ఏకంగా కోతి చేతికి స్టీరింగ్‌ ఇచ్చి దాని వేషాలను చూస్తూ కూర్చున్నాడు. ఇందుకు సంబంధించిన వీడియో సోషల్‌ మీడియాలో వైరల్‌గా మారడంతో కర్ణాటక ప్రభుత్వం సదరు బస్‌ డ్రైవర్‌ని విధుల నుంచి తొలగించింది. ఈ నెల 1న దావణగెరె నుంచి బ్రహ్మసాగర వెళ్తున్న బస్సులోకి ఓ ఉపాధ్యాయుడితో పాటు కోతి ఎక్కింది. రోజూ చూసే కోతి కావడంతో డ్రైవర్ ప్రకాష్ దానిని ఒడిలో కూర్చోపెట్టుకొని స్టీరింగ్ అప్పజెప్పాడు. భయాందోళనలకు గురైన ప్రయాణికులు అభ్యంతరం చెప్పినా వినిపించుకోలేదు. ఓ చేత్తో కోతిని నిమరడం మరోచేత్తో స్టీరింగ్ పట్టుకొని నవ్వుతూ కూర్చొన్నాడు. దీంతో ఓ ప్రయాణికుడు ఈ తతంగాన్ని వీడియో తీశాడు. వీడియోలో కోతి అటూ ఇటూ తిరుగుతూ కనిపించింది. ప్రస్తుతం ఈ వీడియో సామాజిక మాధ్యమాల్లో వైరల్ కావడంతో ఈ విషయం కాస్తా అధికారుల దృష్టికి వచ్చింది. దాంతో ఆ బస్సు డ్రైవర్‌ని సస్పెండ్‌ చేస్తున్నట్లు అధికారులు తెలిపారు.