కొత్త మలుపు తీసుకున్న ఆరుష్‌రెడ్డి మిస్సింగ్ మిస్టరీ

ఆరుష్‌ రెడ్డి మిస్సింగ్‌ మిస్టరీ కొత్త మలుపు తీసుకుంది. ఏలూరు రైల్వేస్టేషన్‌లో దొరికిన బాలుడు ఆరుష్‌ కాదని తేలడంతో.. మరి ఆ బాలుడెవరు..? అతడి తల్లిదండ్రులెవరు..? తల్లి పొత్తిళ్లలో పెరగాల్సిన చిన్నారి.. రైల్వేస్టేషన్‌లో ఎలా ప్రత్యక్షమయ్యాడు..? తన కుమారుడే అన్న ఆ మహిళ ఎక్కడికెళ్లింది..?

ఈ చిన్నారి ఏ తల్లి కన్న బిడ్డో ఎవరికీ తెలీదు. ఇటీవల సంచలనం సృష్టించిన జషిత్‌ ను వెతికే క్రమంలో ఈ నెల 20 న ఏలూరు రైల్వేస్టేషన్‌లో 5 రోజుల క్రితం మధ్యం మత్తులో ఉన్న మహిళ పక్కన ఉండగా పోలీసులు స్వాధీనం చేసుకున్నారు. అప్పటి నుంచి శిశు గృహంలో ఉంటున్న ఈ చిన్నారి ఎవరనే విషయాన్ని తెలుసుకునే ఎవరూ ప్రయత్నం చేయలేదు.

అయితే జషిత్‌ క్షేమంగా ఇంటికి చేరడంతో ఈ బాలుడే ఆరుష్ అనే అనుమానం వచ్చింది. ఈ విషయాన్ని HMTV బృందం ప్రకాశం జిల్లాలో అదృశ్యమైన బాలుడి తల్లిదండ్రుల దృష్టికి తీసుకెళ్లింది. ఈ చిన్నారికి ఆరుష్ రెడ్డి పోలికలు ఉండటంతో ఆ తల్లిదండ్రులు సంబరపడ్డారు. తమ బిడ్డ దొరికాడని ఆనందపడ్డారు. అయితే వారి సంతోషం నిమిషాల్లోనే ఆవిరైపోయింది.

ఆ బాలుడు ఆరుష్ కాదని పోలీసులు నిర్ధారించారు. దీంతో ఏలూరులో దొరికిన ఈ చిన్నారి ఎవరనే ప్రశ్న తెరపైకి వచ్చింది. జషిత్ ను వెతికే క్రమంలో ఈ బాలుడిని స్వాధీనం చేసుకున్న పోలీసులు శిశు హోంలోకి తరలించారు. కానీ ఆ పిల్లాడు ఎవరనే దానిపై విచారణ చేయలేదు. అసలా బాలుడు ఎవరు..? రైల్వేస్టేషన్‌లో ఎందుకున్నాడు..? తన బిడ్డే అన్న మహిళ అందుకు ఆధారాలు తీసుకొస్తానంటూ ఇంతవరకు ఎందుకు రాలేదు..? ఆ బాలుడిని ఎక్కడి నుంచి తీసుకొచ్చారు..? ఆ చిన్నారి ఎందుకు తల్లిదండ్రులకు ఎందుకు దూరమయ్యాడు..? ఎన్నాళ్ల క్రితం తప్పిపోయాడు..? తప్పిపోయాడా..? లేక, కిడ్నాప్ చేశారా..? అసలు ఈ బాలుడు ఎవరి అబ్బాయి..? ఏలూరుకి ఎలా వచ్చాడు..? అనే ప్రశ్నలు తెరపైకి వస్తున్నాయి.

ఇలా రాష్ట్రంలో చిన్నారులు అదృశ్యమైన ఘటనలు చాలానే ఉన్నట్లు కనిపిస్తున్నాయి. అయినా 5 రోజుల క్రితం దొరికిన బాలుడెవరనే దానిపై పోలీసులు ఎందుకు విచారణ చేపట్టలేదో ఇప్పటికీ అర్థం కాని ప్రశ్న. దీన్ని బట్టి చూస్తే రాష్ట్రంలో చాలా మిస్సింగ్‌ కేసుల్లో పురోగతి లేకపోవడానికి పోలీసుల నిర్లక్ష్యమే కారణమనే వాదనలు వస్తున్నాయి.