రీమేక్ సినిమా తో అదృష్టం పరీక్షించుకోనున్న చై

ప్రస్తుతం అక్కినేని నాగచైతన్య టైం అసలు బాగోలేదు. చేసిన ప్రతి సినిమా ఫ్లాప్ అవుతుంది. 'శైలజా రెడ్డి అల్లుడు', 'సవ్యసాచి' సినిమాలతో వరుస ఫ్లాపుల ను అందుకున్న నాగచైతన్య ప్రస్తుతం తన భార్య సమంతతో శివనిర్వణ దర్శకత్వంలో 'మజిలీ' అనే సినిమా చేస్తున్నాడు. ఇక మరోపక్క పీపుల్ మీడియా ఫ్యాక్టరీ మరియు కోన ఫిలిం కార్పొరేషన్ ప్రొడక్షన్ బ్యానర్లు ఆయుష్మాన్ ఖురాన్ హీరోగా తెరకెక్కిన బాలీవుడ్ సినిమా 'బరేలీ కి బర్ఫీ' రీమేక్ రైట్స్ ను చేజిక్కించుకున్నారు. ఒక యువ హీరో తో తెలుగు రీమేక్ ని చేయించాలని అనుకుంటూ నాగచైతన్యను కలిశారు.

నాగచైతన్యకు స్క్రిప్ట్ బాగా నచ్చిందని తెలుగు రీమేక్లో నటించడానికి రెడీ గానే ఉన్నట్లు తెలుస్తోంది. కాకపోతే ఇప్పటికే నాగ చైతన్య చేతిలో కొన్ని సినిమాలు ఉన్నాయి కాబట్టి ఇంకా ఈ సినిమా గురించి ఫైనల్ కాల్ తీసుకోవాల్సి ఉంది. ఒక వారంలో నాగచైతన్య తన అభిప్రాయాన్ని చెప్పనున్నాడని తెలుస్తోంది. ఇప్పటికే మలయాళం సినిమా 'ప్రేమమ్' రీమేక్ తో మంచి హిట్ అందుకున్న నాగచైతన్య ఈ సారి హిందీ రీమేక్ లో నటించనున్నాడు. మరి ఈ రీమేక్ తో ప్రేక్షకులను ఎంత వరకు మెప్పించగలడో వేచి చూడాలి.