దారుణం : టికెట్‌ లేదంటే అత్యాచారం జరిపే టీసీ

చెన్నైకి చెందిన ఓ టీసీ టికెట్ లేకుండా రైల్లో ప్రయాణించే మహిళల పట్ల దారుణానికి పాల్పడుతున్నాడు. వారిపై బలవంతంగా అత్యాచారాలు జరుపుతున్నాడు. ఓ లాడ్జిలో యువతితో ఏకాంతంగా గడుపుతున్న టీసీ సహా ముగ్గురిని పోలీసులు అరెస్టు చేయడంతో కొంతకాలంగా సాగుతున్న అతడి వ్యవహారం వెలుగులోకి వచ్చింది.

చెన్నై ఈస్ట్‌ తాంబరం ప్రాంతానికి చెందిన ఓ టీసీ. ఎగ్మూరు రైల్వేస్టేషన్‌లో పనిచేస్తున్నాడు. రైళ్లలో టికెట్‌ లేకుండా ప్రయాణించే మహిళలను అతను పట్టుకునేవాడు. అయితే వారివద్ద అపరాధ రుసుము వసూలు చేయకుండా, తనతో గడపాలని, లేదంటే కేసుపెట్టి జైలుకు పంపిస్తానని బెదిరించేవాడు. దాంతో కొందరు మహిళలు అతడికి లొంగేవారు. ఈ క్రమంలో శుక్రవారం రాత్రి ఎగ్మూరులోని ఓ లాడ్జిలో వ్యభిచారం జరుగుతోందన్న సమాచారంతో పోలీసులు దాడులు జరిపారు. ఈ దాడిలో టీసీ ఓ యువతితో కలిసి ఉండగా పట్టుకున్నారు. అతడికి సహకరించిన ముగ్గురు వ్యక్తులను సైతం పోలీసులు అదుపులోకి తీసుకున్నారు. విచారణ జరుపుతున్న పోలీసులకు అతడి రాసలీలలు వెలుగులోకి వచ్చాయి. దాంతో కొంతకాలంగా టీసీకి సహకరిస్తున్న లాడ్జి యజమాని కూడా అదుపులోకి తీసుకున్నారు.