వార్నర్ ఇంట తీవ్ర విషాదం.. కన్నీటిపర్యంతమైన వార్నర్ భార్య

ఇటీవల దక్షిణాఫ్రికా-ఆస్ట్రేలియా సిరీస్‌లో బాల్‌ ట్యాంపరింగ్‌కు పాల్పడటంతో ఆస్ట్రేలియా కెప్టెన్‌ స్టీవ్‌ స్మిత్‌, బ్యాట్‌మెన్‌ డేవిడ్‌ వార్నర్‌లు ఏడాది పాటు నిషేధం ఎదుర్కొంటున్న సంగతి తెలిసిందే. ఈ సంఘటనతో మానసికంగా కుంగిపోయిన వార్నర్‌.. తన ఇంట్లో జరిగిన మరో ఘటన తీవ్రంగా కలిచివేసింది. దానికి సంబంధించి వార్నర్‌ సతీమణి కాండిష్‌ వార్నర్‌ స్థానిక మహిళా వారపత్రికకు ఇచ్చిన ఇంటర్వ్యూలో వివరాలు వెల్లడించారు.

బాల్ ట్యాంపరింగ్ వివాదం తమ వ్యక్తిగత జీవితాన్ని తీవ్రంగా ప్రభావితం చేసిందని ఆమె వాపోయింది. ‘గత మార్చిలో దక్షిణాఫ్రికా పర్యటన సమయంలో గర్భం దాల్చిన విషయం తెలిసింది. ఇద్దరం ఎంతో ఆనందించాం’ అని క్యాండీస్ చెప్పింది. కానీ బాల్ ట్యాంపరింగ్ వివాదం, తదనంతర పరిణామాల వల్ల బిడ్డను కోల్పోవాల్సి వచ్చిందని ఆవేదన వ్యక్తం చేసింది.

సుదీర్ఘమైన విమాన ప్రయాణం, మానసిక వేదన, జనం ఛీత్కారాలు తనపై తీవ్ర ప్రభావం చూపాయని వార్నర్ భార్య తెలిపింది. ‘‘బాత్రూంలో ఉండగా.. రక్తస్రావమైంది. దీంతో వార్నర్‌ను పిలిచాను. గర్భస్రావమైందని మాకు అర్థమైంది. ఒకరినొకరం పట్టుకొని ఇద్దరం ఎంతో ఏడ్చాం. మా జీవితాలను ఏ ఘటనా ఇంతలా ప్రభావితం చేయలేదు. లిటిల్ వార్నర్ పుడతాడని ఆశించాం. కానీ భూమి మీద పడకుండానే అబార్షన్ అయ్యింద’’ని క్యాండీస్ తెలిపింది.

వార్నర్ దంపతులకు ఇప్పటికే ఇద్దరమ్మాయిలు ఉన్నారు. పెద్ద పాప ఇవీ మే(3 ఏళ్లు), చిన్నపాప ఇండీ రే (2 ఏళ్లు). మూడోసారి తమకు బాబు పుడతాడని వార్నర్ దంపతులు ఆశించారు. సౌతాఫ్రికా పర్యటన వార్నర్‌కు ఏమాత్రం కలిసి రాలేదు. తొలి టెస్టులో క్వింటన్ డికాక్‌తో అతడు గొడవకు దిగాడు. తన భార్య గురించి డికాక్ అసభ్యంగా మాట్లాడాడని వార్నర్ చెప్పాడు. మూడో టెస్టులో వార్నర్ సూచన మేరకు బాన్‌క్రాఫ్ట్ బాల్ ట్యాంపరింగ్‌కు పాల్పడుతూ దొరికిపోయాడు. దీంతో క్రికెట్ ఆస్ట్రేలియా వార్నర్‌పై ఏడాది నిషేధం వేటు వేసింది.